Қызылқайрат ауылдық Мәдениет үйіне жиылған қауым Қазақстан халқы Ассамблеясының ынтымақ пен бірліктің ұйытқысы екендігіне тағы бір мәрте көз жеткізіп, облыстық ішкі саясат басқармасының қолдауымен және облыстық «Славян қауымдастығы» қоғамдық бірлестігінің ұйымдастыруымен өткізілген «Н. Назарбаевтың этносаралық толеранттылық пен қоғамдық келісімнің қазақстандық үлгісі ұлттық сананы сақтаудың негізі» атты игілікті басқосуға куә болды. Этномәдени бірлестіктер мен үкіметтік емес ұйымдар өкілдері қатысқан кездесуді аудан әкімінің орынбасары Дәрменияр Алғатбекұлы ашып, жүргізіп отырды.
– Елбасының салиқалы саясатының арқасында дүниеге келген Қазақстан халқы Ассамблеясы жүйелі жұмыс атқаруда. Бүгінгі басқосуымыздың негізгі мақсаты – тұрақты этносаясатты қалыптастырып, Қазақстан халқы Ассамблеясы жанындағы қоғамдық келісім кеңестерінің рөлін көтеру. Бүгін Ассамблея этносаралық және конфессия- аралық қатынастар саласындағы мемлекеттік саясатты жүзеге асырушы маңызды құралға айналып, елімізде тірлік кешіп отырған барлық ұлттардың өзара тең құқылы қатынасын қамтамасыз етуші рөлін атқаруда, – деп жиынның тиегін ағытқан Д. Алғатбекұлы кездесуге қатысушыларды таныстырып өтті.
Сөз кезегін алған Л.Н. Гумилев атындағы Еуразия ұлттық университетінің профессоры, Қазақстан халқы Ассамблеясының мүшесі, саясаттану ғылымының докторы Наталья Калашникова:
– Өмірімнің өзекті жылдары жер жаннаты Жетісу өңірімен тікелей байланысты. Көпұлтты халықтың татулық бесігіне айналған өңірде адамдар арасындағы мейірім мен ынтымақ-бірліктің тамыры тереңдеп, ұрпаққа ұлағат боларлық жарқын істер жалғасын тауып келеді, – деп Қазақстан халқы Ассамблеясының атқарған ауқымды жұмыстарын жіпке тізгендей етіп баяндап берді. Баяндама барысында модератор Қазақстан жеріне тұрақтаған этностардың тарихын тарқатып өтті. Бүкілқазақстандық бірліктің бірегей моделін қалыптастыруда Қазақстан халқы Ассамблеясының маңызды рөл атқаратындығын атады. Ассамблея – этномәдени бірлестіктердің күш біріктіруін қамтамасыз ететіндігін, соған лайық, республика аумағында 38 Достық үйі, 70-тен астам этномәдени орталық пен 100-ден асатын этномәдени бірлестік ұлтаралық келісім мен татулықты нығайту жолында еңбек етіп отырғандығын айрықша айтып өтті. Олар Қазақстан халқының ұлттық мәдениетінің, тілі мен дәстүрінің өркендеуіне, сақталуы мен дамуына сүбелі үлес қосуда. Тақырыпқа орайластырылған слайд жұмысының да әсері аз болмады.
Шараның басты мақсаты – ұлтаралық келісім мен ұлтаралық қатынастың дұрыс жағдайда өрбуіне ықпал ету. Мемлекетіміздің тарапынан қабылданып жатқан барлық стратегиялық бағдарламалар ұлтаралық татулық пен келісімге негізделген. Бұл жерде, әрине, Қазақстан халқы Ассамблеясына үлкен міндет жүктелген. Сондықтан да шараға қатысушылар осы бағытта ой өрбітті. Солардың бірі облыстық Әзірбайжан бірлестігінің төрайымы, облыстық Ассамблеяның мүшесі Асылы Осман:
– «Бәрін айт та бірін айт» демекші, Елбасымыздың сарабдал саясатын осындай биік дәрежеде айтып, жеткізу – міндетіміз. Мұның ең негізгі ұйытқысы, өзегі – топырақ иесі, яғни, даладай пейілі кең қазақ халқының мейірімі мен қайырымы, – деп өз шығармашылығынан хабар берді. – Менің еңбегімде көпұлтты халқымыздың негізгі ұйыстырушысы – қазақ халқы екендігі айтылған. Бұл күнде біз Елбасының ұстанып отырған саясатының кемелдігін, оны Қазақстан жұртшылығы ғана емес, әлем мойындап отырғанын ұғамыз, сезінеміз. Біз осы уақытқа дейін шын мәнінде экономикаға көңіл бөлдік, ішкі-сыртқы саясатты ұқтық, түсіндік. Енді етек-жеңіміз жиылған тұста Елбасымыздың рухани жаңғыру жөніндегі мақаласы жарияланып, рухани жағынан қамдануымыз керектігі тапсырылып отыр. Рухани жетілусіз толыққанды азамат бола алмаймыз.
Иә, жүзі басқа болса да жүрегі бір, тілі басқа болса да тілегі бір көпұлтты қазақстандықтардың ең ізгі мұраты – ел тыныштығы. Бұл орайда ұлтаралық татулықтың тамырын тереңдетіп, ұрпақ санасына сіңіру – азаматтық парыз саналады.
