Jas.kz

Алматы облысындағы Сарыөзек-Көктал тасжолының 40-шы және 80-шақырым аралығындағы жол жабылды.

«Қазір аталған бағытқа қатынап жатқан жүк таситын көліктерге шектеу қойылды. Арнайы бригада жұмыс істеп жатыр. Қарды аршу жұмыстары жалғасуда», — деді Алматы облыстық Төтенше жағдайлар департаментінің баспасөз хатшысы Азамат Жұртбаев.

Айта кетелік, бұған дейін Кербұлақ ауданының бірнеше ауылының тұрғындары жарықсыз қалған болатын. Мәселен Алтынемел ауылының халқы 4 күн бойы жарықсыз отырды. Мұндай жағдай Қоғалы ауылында да болды. Себеп — ауа-райының қолайсыздығына байланысты электр сымдары үзілген.

Қазір төтенше жағдайлар қызметінің мәліметінше, аталған елді мекендерде жағдай тұрақты. Барлық ауылдарға жарық берілген.

ҚазАқпарат

Алматы облысының полицейлері тұрғындарды қыс мезгілінде жолда өте сақ болуға шақырды, деп хабарлайды ҚазАқпарат.

Биыл жыл басынан бері облыс жолдарында 400-ден аса адам қаза тауып, 2000-нан астамы түрлі жарақат алған.

«Мейлі сен көлік жүргіз, мейлі жаяу жүргінші бол жауапкершілік жүгі бәріне бірдей»,- деді брифинг барысында облыстық ІІД жергілікті полиция қызметі басшысының орынбасары Шыңғыс Сабыров.

Биыл жаяу жүргіншінің кінәсінен өңірде 203 көлік апаты тіркелді. Оның 25 жағдайында жаяу жүргіншілер мас болған. Ал облыс аумағында ең апатты, қауіпті аймақ деп «Алматы-Бішкек», «Алматы-Көкпек-Көктал» және «Алматы-Өскемен» республикалық маңызы бар жолдары белгіленіп отыр. Сондай-ақ тәртіп сақшылары авто және таксопарктерде кадр саясатын қатаңдатуды талап етуде.

Себебі тек қоғамдық көлік жүргізушілерінің қатысуымен 2016 жылы өңірде 28 жол-көлік оқиғасы болған. Ол жерде 10 адам қаза тауып, 50-ден астамы түрлі дене жарақаттарын алған. Жергілікті полицияның мәлімдеуінше, көп жағдайда он және одан да көп жолаушы таситын автобустарды тәжірбиесі мен жүргізушілік өтілі аз азаматтар тізгіндейді.

Биыл Алматы облысында туу көрсеткіші жоғары. Облыстық перинаталдық орталықта жыл басынан бері 5200-ден аса сәби дүниеге келді. Олардың басым бөлігі — ұл балалар.

Ұлды болғандардың  бірі — Эльвира Нұғманова. Үш қызынан кейін көптен күткен ұлдары дүниеге келді. Атасы ырымдап немересін Ақберен деп атапты.

«Баланың салмағы 4кг 200 гр. Бойы 56 см. Көп балалы ана атанып жатырмыз. Өте қуаныштымыз», — дейді талдықорғандық Эльвира.

Талдықорған қаласындағы облыстық перинаталдық орталықта күніне 20-ға жуық әйел босанады. Аталған перзентхана  облыстың 7 ауданы мен 2 қаласына қызмет көрсетеді. Мұндағылар үшін бір сәтке де тыным жоқ. Уақытынан бұрын босану, жоспарсыз жүкті болу сынды жайттар жиілеген. Салдарынан 700 грамм салмақтағы сәбилер дүниеге келіп жатыр. Сол себепті, әр жүктілікті жоспарлау керек деп, дәрігерлер кеңес береді. Және жылда-жылда жүкті болу ананың да баланың да денсаулығының төмендеуіне әкеледі, дейді Алматы облыстық перинаталдық орталығының директоры Қалихан Жұмашев.

Сонымен қатар,  көп жағдайда жас аналар босануға дайын болмай келеді екен. Арнайы сабақтарға қатыспайды, салдарынан толғақ кезінде қиналады. Сондай-ақ соңғы жылдары кесір тілігі арқылы босанатындар саны да күрт көбейді. Себебі өздігінен босануға аналардың ағзалары әлсіз. Бұл өз кезегінде нәзік жандылардың өз денсаулықтарына немқұрайлық танытуынан болып отыр дейді мамандар.  Дегенмен, қазір озық технологиялардың арқасында бала мен ана өмірін сақтап қалуға барлық жағдай қарастырылған.

ҚазАқпарат

«100 нақты қадам» Ұлт жоспарының ет өндіру мен өңдеу ісін дамыту туралы тапсырмасына орай Балқаш ауданында іргелі жұмыстар атқарылуда. Аудан әкімі Ғалым Тоқпейісовтің айтуынша, бүгінгі күнге дейін аудан ішкі нарыққа 1038 тонна сиыр еті өткізген. Өткен жылы «Жақсылық» шаруа қожалығы Қырғыз еліне экспортқа ет шығарды.

Осы аудандағы «Дархан» шаруа қожалығы жеке қаражаты есебінен 12 млн. теңгеге 200 бас ірі қараға арналған мал бордақылау алаңын салып жатыр.

Отбасылық шаруашылық түрлдерін қолдау аясында «Игілік — 2009» шаруа қожалығы 30 басқа, «Аңсар» шаруа қожалығы 40 басқа арналған отбасылық бордақылау алаңдарын құрып, жұмыс істеуде.

XXVIII Дүниежүзілік қысқы Универсиаданың өту барысын насихаттайтын БАҚ өкілдері үшін аккредитацияға өтініш қабылдау басталды. БАҚ аккредитациясына өтініштер 2016 жылдың 29 желтоқсанына дейін қабылданады. Халықаралық және отандық БАҚ өкілдері үшін аккредитациядан өту Ойындардың almaty2017.com ресми сайтында  орналасқан «БАҚ аккредитациясы» бөлімінде жүзеге асырылады.

Тіпкелушінің аккредитациядан өткендігі туралы мәліметті электронды поштасына келетін ресми растау арқылы білуіне болады.

Аккредитациядан өткен шетелдік БАҚ өкілдері үшін виза алу жолдары жеңілдетіледі. Бұл үшін олар  аккредитациядан сәтті өткенін растайтын жазбаны өз еліндегі Қазақстан Республикасының елшілігіне көрсетуі тиіс.

Жарысқа және Универсиаданың басқа да шараларына бару үшін тіркелуші өз есімі жазылған бейджді Алматы қаласы, Байзақов 280, 1-қабат  («Almaty Towers») мекенжайында орналасқан Аккредитация ортағына барып алуы қажет.

Аккредитация орталығы 2017 жылғы 10 қаңтар мен  8 ақпан аралығында сағат 9:00 мен 21:00 аралығында жұмыс істейді. Ойындар уақытында 8 баспасөз-орталығы жұмыс істейді. Қосымша ақпаратты + 7 727 2647113, + 7 727 2646737, + 7 727 2647112, +7 727 3132358 телефондары арқылы немесе pressaccreditation@almaty2017.kz электронды поштаға хат жазу арқылы алуға болады.