Jas.kz

Алматы облысында туризм саласы қарқынды дамуда. Мәселен Райымбек ауданының бюджетіне биылғы жылдың 10 айында ақылы туристік қызметтен 11 миллион теңгеден астам қаражат түскен.

Аудан әкімі Жанат Тажиевтің айтуынша, биыл ауданға  15 мыңнан астам демалушы келген. Оның басым бөлігі шетелдік қонақтар. Қазіргі уақытта Райымбек ауданында туризмді дамыту бойынша, Мыңжылқы жайлауында «Джади-вилла» атты демалушыларға қызмет көрсету орны салынып жатыр. Және Саты ауылының шеңберінен туристік нысандарды іске қосатын инвесторларға 12 гектар жер телімі бөлінді. Одан өзге, 2017 жылы «Көлсай Көлдері» табиғи паркінде орналасқан 10 қонақ үйге қайта жаңғырту жұмыстары жүргізіледі.

ҚазАқпарат

Талдықорған қаласында дзюдодан жасөспірімдер арасында дәстүрлі республикалық турнир мәресіне жетті. Биылғы дода Ел Тәуелсіздігінің 25 жылдығына және белгілі бапкер Роберт Кимнің 65 жасқа толуына арналды.

Жасөспірімдер арасындағы дәстүрлі жарыс биыл төртінші жыл қатарынан өтіп келеді. Ұйымдастырушылардың айтуынша, желтоқсан айында өтетін дзюдодан ашық біріншілік бұл бапкерлер үшін де, жас спортшылар үшін де жылды қорытындылайтын шараға айналған.

Өткен төрт жылда жас дзюдошылардың шеберліктері шыңдалып қана қоймай, спорттық сайыстың қамту ауқымы да ұлғайып, облыстан республикалық дәрежеге жетіп отыр. Танымал жаттықтырушы Дмитрий Хегайдың айтуына қарағанда, биылғы турнирге Алматы облысының аудандарынан бөлек Оңтүстік Қазақстан, Шығыс Қазақстан және Жамбыл облысының жастары келген.

«Осылайша, дәстүрлі дзюдо додасы республикалық деңгейге шығып отыр. Алматы облысының барлық аудандарынан, Қапшағай мен Алматы қаласынан да спортшылар бар. 27 салмақ категориялары бойынша 600-ден астам дзюдошы сайысқа қатысуға өтініш білдірген болатын», — дейді Д. Хегай.

Оның айтуынша, спортшылардың жас шамасы 10-13 жасты құрайды. Сонымен қатар, турнирде топ жарған дзюдошылар ұлттық құраманың резервтері болып қана қоймай, республикалық және Азия чемпионаттарының ресми жарыстарына да қатысатын болады.

Республикалық деңгейдегі сайыс үш күнге жалғасып, командалық есепте Алматы облысы Лепсі ауданы спорт интернатының дзюдошылары бірінші орынға ие болды. Олардың қоржынында 5 алтын, 4 күміс және 5 қола медаль бар. Ал Талғар ауданының және Талдықорған қаласының командалары мықтылар үштігінен көрінді.

ҚазАқпарат

Алматы облысында «Даму-Көмек» бағдарламасы аясында 4 мүмкіндігі шектеулі жанға көмек көрсетілді. Олардың әрқайсысына тігін машинасы мен көп функционалды принтерлер табыс етілді.

Әсел Өскембаева, Қуаныш Қапанов, Эльмира Әмзиева және Маржан Молдиярова  «Даму» кәсіпкерлікті дамыту қорына көмек сұрап, өз өтінімдерін берген болатын. Мәселен,  екі баланың анасы Әсел Өскенбаева үйде отырып іс тігеді. Ол үшін көп функционалды тігін машинасы қажет еді. Енді Әсел жаңа тігін машинасымен халыққа әдемі әрі сапалы  дүниелерді ұсынамын дейді. Нәпақасын іс тігіп, саудадан тапқан жан демеушілік жасаған жандарға алғысын білдіруде.

ҚазАқпарат

Жуырда «Алматы облыстық жергілікті агроөнеркәсіп кешені және мемлекеттік қызметкерлер» қоғамдық бірлестігіндегі басқосуда осы ұжымның жетекшісі Тастан Тоқсейітов ел Тәуелсіздігінің ширек ғасырлық мерейтойына арналған «Кәсіп­одақтардағы 25 игілікті іс» атты байқаудың қорытындысын хабарлады.

Ең алдымен аталған бір­лестіктегі атқарылып жатқан жұмыстар туралы аз-кем тоқ­та­ла кетелік. Алматы және Ал­маты облысындағы 476 бас­тауыш ұйымды қосып отыр­ған бұл бірлестіктің құ­ра­мына 35 мыңға жуық кәсіп­одақ мүшелері топтасқан. Мұн­да агроөнеркәсіптік сала­ның адамдарымен бірге мем­л­екеттік мекемелер, ден­сау­лық пен білім беру қыз­ме­ті­нің өкіл­дері де бар. Аталған ұжым­ның басты мақсаты – еңбеккерлер құқығын заңдық негіздерге сай қорғау болып табылады.

Осыған орай жыл ішінде 476 ұжымдық шарт жасалған. Ол құжаттарда еңбеккерлерге әлеуметтік-тұрмыстық жағдай жасауға көңіл бөлінген. Жыл сайынғы қосымша еңбек де­ма­лысы, сырқаттанған жағ­дайда қызметкерлерге қо­сым­ша ақы төлеу, балалар сауық­тыру лагерьлеріне жолдама беріп отыру, қайырымдылық көмекке зәру жандар мен зей­нет­керлерге жәрдемдесу, жұ­мыс беруші кәсіпорындағы жұмысшы орнының тұрақты болуына кепілдік беру секілді жайлар назарда ұсталған.

Қарасай, Көксу, Сарқан, Ақсу, Еңбекшіқазақ, Жамбыл аудандарындағы кәсіподақ ұйым­дарында оң өзгерістер үнемі байқалып келеді. Мұн­дағы кәсіподақ мүшелері «Са­ры­ағаш», «Көктем», «Жаңа­қорған», «Жаркент-Арасан», «Меркі», «Керімағаш» шипа­жайларында көптеп демалған. Тұрмысы төмен отбасылардың балаларына «Жас құрылысшы» сауықтыру лагеріне жолдама берілген. «Мектепке жол» ак­циясы бойынша бірқатар оқу­шылар құрал-жабдық, оқулық­тармен қамтамасыз етілген.

– Сондай-ақ, бастауыш кә­сіп­одақ ұйымдары арасында волейбол, баскетбол, арм­рест­лингтен жарыстар өткізілді. «Ән – 2016» және мемлекеттік тілге арналған мазмұнды бай­қаулар ұйымдастырылды. Ұлы Отан соғысы ардагерлеріне көңіл бөлініп, оларға ерекше құрмет көрсетілді, – деді Тас­тан Тоқсейітов.

Алдағы уақытта да бір­лестік жұмыстарын ширату одан әрі нығая бермек. Кәсіп­одақ ұйымдары жетекшілерінің жанды кездесулерін өткізу жоспарланып отыр. Семи­нар­лар мен пікір алмасулар жолға қойылады. Жаңа міндеттер белгіленді.

Қоғамдық бірлестіктің тө­р­а­ғасы «Кәсіподақтардағы 25 игілікті іс» байқауында озып шыққан үздіктердің есімдерін атады. Аудандық кәсіподақтар бойынша: бірінші орын – Қара­сай аудандық кәсіподағының төрағасы Сағындық Жыл­қы­баевқа, екінші орын – Сарқан аудандық кәсіподақ ұйымының төрайымы Гүлнар Мұқановаға, үшінші орын – Ақсу аудандық кәсіподақ ұйымының төра­йы­мы Бақыт Құрманғалиеваға берілді.

Бастауыш кәсіподақ ұйым­дары бойынша да үздіктер анықталды. Олардың ішінде бірінші орынды Қазақ ұлттық аграрлық университетінің кә­сіп­одақ ұйымының төрағасы Әшірәлі Сманов, екінші орын­ды Қазақ ветеринария ғылыми зерттеу институты кәсіподақ ұйымының төрайымы Сал­танат Мамановаға, үшінші орын Қазақ мал шаруа­шы­лы­ғы және жемшөп өндіру ғы­лы­ми зерттеу инс­ти­ту­ты­ның кә­сіп­одақ ұйымының төрағасы Михаил Тама­ровскийге та­быс­талды.

Қоғамдық бірлестік төра­ға­сының орынбасары Рая Ыды­ралиева жүлдегерлерді ар­найы дипломдармен мара­паттап, бағалы сыйлықтар табыс етті.