Өңірлер орталығынан – шешімдер орталығына: Қазақстанның бірінші Урбан форумы Қызылордада өтуде
Қызылорда бүгін ұлттық ауқымдағы маңызды алаңға айналды. Мұнда алғаш рет Қазақстанның Ұлттық Урбан форумы — 2025 өтіп жатыр. Бұл — қалалардың болашағын жоспарлап, жаңа даму парадигмаларын ұсынатын мамандар үшін аса маңызды оқиға.
Іс-шара Қызылорда облысы әкімдігінің, БҰҰ-ның UN-Habitat бағдарламасының және бірқатар серіктестердің қолдауымен ұйымдастырылды.
«Бұл — жай ғана форум емес, жаңа дәстүрдің бастауы. Қазақстан UN-Habitat аясындағы жаһандық урбанистік қозғалысқа қосылып, нақты өзгерістерді іске асыруға бет алды. Біз болашақ қалалар туралы ғана емес, оны осы жерде және дәл қазір қалыптастырып жатырмыз», — деп атап өтті ұйымдастырушылар.
Форумның миссиясы:
Қазақстан қалаларын дамытуда тұрақты шешімдер жүйесін құру. Бұл жүйе үш деңгейге негізделген:
-
Әлемдік – UN-Habitat қамқорлығындағы жаһандық форумдарға қатысу арқылы;
-
Аймақтық – шетелдік тәжірибе алмасу арқылы;
-
Ұлттық – ел ішіндегі қалалар мен қауымдастықтар арасында өзара диалог құру арқылы.
Негізгі тақырып:
«Өңірлерден бастау алатын кешенді қалалық қайта құру: Қазақстандағы теңгерімді, инклюзивті және климаттық өзгерістерге төзімді қалаларды қалыптастыру»
Қатысушылар мынадай мәселелерді талқылап жатыр:
-
Жаңа қалалық күн тәртібі (New Urban Agenda) мен Орнықты даму мақсаттары (ЦУР) аясындағы стратегиялар;
-
Қала мен ауыл арасындағы байланысты күшейту;
-
Климаттық бейімділік және жасыл инфрақұрылым;
-
Жастардың урбанистикадағы рөлі;
-
Қалаларды басқарудағы цифрлық тәсілдер.
Қызылорда секілді шағын қалалардың ұлттық даму стратегиясындағы орны мен қалалық бірегейлікті қалыптастырудағы маңызы да форум талқысының негізгі өзегіне айналды.
«Жаңа урбанистік күн тәртібі — Қазақстанның қала дамуының ұлттық бағытын жүйелеуге негіз болады. Ол аймақтар, сарапшылар және үкімет арасындағы үйлестіру тетіктерін жолға қойып, әр азаматтың — белсендіден бастап әкімге дейін — қаланың дамуына қатысуына мүмкіндік береді», — деді UN-Habitat өкілдері.
Құрметті қонақтар қатарында:
-
Экология және табиғи ресурстар министрі Ерлан Нысанбаев,
-
Сыртқы істер министрінің бірінші орынбасары Ақан Рахметуллин,
-
Құрылыс және тұрғын үй-коммуналдық шаруашылық істері комитетінің төрағасы Бақытжан Жүнісбеков,
-
UN-Habitat атқарушы директорының міндетін атқарушы Рафаэль Тутс,
-
БҰҰ-ның Қазақстандағы тұрақты үйлестірушісі Саранго Раднарагча бар.
Панельдік сессияларда сөз алған халықаралық сарапшылар:
-
Гарри Доббс (Harry Dobbs Design);
-
Риккардо Марини (Marini Urbanismo);
-
Юрий Милевский (NOVAYA Labs);
-
Мария Скрябина (База 14) және басқалар.
«Урбанизация — тек сәулет қана емес, бұл — адамдар туралы. Біз өзіміз өмір сүргіміз келетін қалаларды саламыз. Ал Қызылорда бұл үдеріске көшбасшылық ете алатынын дәлелдеді», — деп түйіндеді қатысушылар.
Айта кетейік, бұл форум — Польша, Әзербайжан және Грузия секілді елдерде өткізілетін UN-Habitat халықаралық форматының құрамдас бөлігі.