Jas.kz

Оңтүстік Қазақстан облысының әкімі Жансейіт Түймебаев, «Түрксой» халықаралық ұйымының Бас хатшысы Дүйсен Қасейіновпен  Шымкент қаласында орналасқан мәдениет нысандардың тыныс-тіршілігімен танысып, өнер қызметкерлерімен жүздесті, деп хабарлайды ОҚО әкімінің баспасөз қызметі.

Ең алдымен аймақ басшысы 2014 жылы Елбасының қатысуымен ашылған «Түркістан сарайы» ғимаратында болды. Танысу барысында облыстық Мәдениет басқармасының басшысы Н.Ахметжанов мәдениет сарайының жұмысы туралы ақпарат берді.

Яғни, ол, 1304 көрермен залы бар ғимараттың сахнада орнатылған дыбыс күшейткіші, жарық беру құрал-жабдықтарының сапасының төмен екендігіне тоқталып, жоғары деңгейдегі концерт өткізу үшін тағы да бірқатар техникалардың жетіспейтінін атап өтті.

Мәдениет үйінің жай-күйімен танысқан әкім облыстың мәдениетін республикалық және халықаралық деңгейге көтеру үшін ең алдымен өнер үйлерінің жұмысын жандандыруды айтып, аталған мекемеге қажетті құрал-жабдықтарды алу мәселесін қарастыруды облыс әкімінің орынбасары Ұ.Сәдібековке тапсырды.

Сонымен қатар, өңір басшысы Жұмат Шанин атындағы облыстық  академиялық қазақ  драма театрында болып, ұжыммен кездесті.

Мекеме 1934 жылы құрылған. 2014 жылдың қараша айында жаңа ғимаратқа көшіп, Қазақстан Республикасы Үкіметінің 2015 жылғы 24 ақпандағы №77 қаулысымен «Академиялық» мәртебе берілген.

Театр  ғимаратында 500 адамға арналған  көрермен залы, мұражай, 2 фойе бар.

Үш қабаттан тұратын театр заманауи құрал-жабдықтармен толық  жабдықталғанымен, сахналық жарық беретін құрал-жабдықтар мен жылу жүйесі  талапқа сай емес. Осыны ескерген облыс әкімі сала басшыларына аталған кемшіліктерді жою мақсатында тиісті шара қабылдап, жұмысты жүйелеуді міндеттеді.

Аймақ басшысы театр ұжымымен кездесіп, бірқатар әлеуметтік мәселелерді талқылады. Онда өнер азаматтары қызметтік пәтерлердің болмауы мен жатақхананың жетіспеушілігінен кәсіби жас мамандардың тұрақталмайтындығын жеткізіп, басқа да актерлердің әлеуметтік жағдайын сөз етті.

Өз кезегінде мәдениет қызметкерлерінің ұсыныс-тілегін тыңдаған облыс әкімі Ж.Түймебаев облыс әкімінің орынбасары Ұ.Сәдібековке, облыстық Мәдениет басқармасының басшысы Н.Ахметжановқа театрға қажетті құрал-жабдықтарды алу, актерлердің әлеуметтік мәселесін шешуді қарастыруды тапсырды.

Сонымен қатар, шығармашылық ұжымның талмай еңбек етуіне, ізденістерінің бұдан да  жоғары деңгейде болуына тілектестігін білдіріп, алдағы жылдары халықаралық шаралармен бірге түркітілдес елдер арасында өтетін  байқауларға қатысуға әрқашан қолдау көрсететіндігін жеткізді.

Ұлттық музейде Тәуелсіздіктің 25 жылдығы қарсаңында мемлекеттік музейлер мен қорық-музейлер арасында ұйымдастырылған «Ең үздік музей» атты республикалық байқаудың жеңімпаздарын марапаттау рәсімі өтті, деп хабарлайды ҚазАқпарат. Байқау жұмысы қыркүйекте басталып екі ай бойы жалғасқан.

Нәтижесінде байқауға қатысушы үміткерлер Үздік мемлекеттік музей (облыстық дәрежедегі), Үздік қорық-музей, Үздік мемлекеттік музей (аудандық (қалалық) дәрежедегі), Мемлекеттік музейдің (облыстық дәрежедегі) үздік қызметкері, Мемлекеттік қорық — музейдің үздік қызметкері, Мемлекеттік музейдің (аудандық (қалалық) дәрежедегі) үздік қызметкері номинациялары бойынша марапатталды.

«Облыстық дәрежедегі үздік мемлекеттік музей» номинациясын ОҚО Тарихи-өлкетану мұражайы жеңіп алса, «Үздік қорық-музей» номинациясын ШҚО Сәулет-этнографиялық және табиғи-ландшафтық музей-қорығы иеленді. «Аудандық, қалалық дәрежедегі үздік мемлекеттік музей» номинациясы бойынша Жезқазған тарихи-археологиялық музейі жеңімпаз атанды. Бұдан бөлек еліміздегі музейлердің қызметкерлері де марапатталды.

Салтанатты шарада сөз алған Мәдениет және спорт министрлігінің Жауапты хатшысы Қуатжан Уалиев: «Біз Тәуелсіздіктің 25 жылдығына үлкен жетістікпен жеттік. Ол жетістіктерге музей саласының қызметкерлерінің қосқан үлесі аз емес. Тәуелсіздік алғалы еліміздегі музейлердің барлығы аяқтарынан нық тұрды. Елбасы Ұлттық музей салуға ұйытқы болып, өзге музейлерді де дамытуға ерекше көңіл бөлді. Бүгінгі өтіп жатқан байқау ендігі жерде өз жалғасын табатынына сеніміміз кәміл» деп, музей саласындағы қызметтің маңыздылығына тоқталып өтті.

Байқаудың негізгі мақсаты — мемлекеттік музейлер мен қорық- музейлердің және музей қызметкерлерінің жұмысын ынталандыру және жетілдіру. Сонымен қатар, музей саласындағы шығармашылық және инновациялық бастамаларға қолдау көрсету.

Жеңімпаздарға Қазақстан Республикасы Мәдениет және спорт министрлігінің атынан дипломдар және бағалы сыйлықтар табысталды.

Оңтүстік Қазақстан облысының студент жастары Ақмола облысында өткен республикалық ХІІ Ұлттық жастар Дельфий ойындарында төрт алтын бір күміс медальға ие болды, деп хабарлайды ОҚО әкімінің баспасөз қызметі.

ҚР Тəуелсіздігінің 25 жылдығына орай ұйымдастырылған байқауға облыстан 21 жас қатысып 8 номинация бойынша додаға түсті.

Білімді де өнерлі жастарымыз дəстүрлі əн салу номинациясы бойынша облыстық саз колледжінің студенттері Ақжол Өсербай, қыл-қобыз номинациясынан Рахымжан Нұрлыхан, домбыра номинациясы бойынша Дастан Ибрагим, ал халық биі бойынша «Қаракөз» би ансамблі (М.Əуезов атындағы ОҚМУ) алтын медальге ие болса, актерлік шеберліктен, яғни, театр бағытында Х.А.Яссауи атындағы ХҚТУ-ң студенттері күміс медальді қанжығаларына байлады.

Аталған шараға Қазақстанның түкпір-түкпірінен 500-ден аса қатысушы 17 түрлі номинация бойынша қатысты.

Жеңімпаздар мен қатысушы өнерпаздарымызды шын жүректен құттықтаймыз!

Бүгін Оңтүстік Қазақстан облысының әкімі Жансейіт Түймебаев аймақтың спорт саласы қызметкерлерімен кездесті. Басқосуға облысымыздың спорт ардагерлері мен осы салада еңбек етіп жүрген қызметкерлер және үздік спортшылар, сондай-ақ, ҚР Мәдениет және спорт министрлігі Дене шынықтыру және спорт комитетінің төрағасы Елсияр Қанағатов қатысты. Жиында облыстық дене шынықтыру және спорт басқармасының басшысы Әлібек Нұртаев осы жылдың 9 айында атқарылған жұмыстар мен алда тұрған міндеттер жайын баяндады. Атап айтқанда, есепті мерзімде облыс аумағында 3,5 мыңнан астам бұқаралық спорттық іс-шаралар өткізіліп, оған 431 мыңнан астам адам қатысқан. Сонымен бірге, салауатты өмір салтымен тұрақты түрде шұғылданушылар саны 674172 адамды құрап, облыстағы барлық жастағы халықтың қамтылуы 23,7 % жетіп отыр.

Бүгінгі таңда, облыс көлемінде 59 (36 олимпиадалық, 23 олимпиадалық емес) спорт түрлері дамытылып жатса, оғландарымыз ҚР чемпионаттары мен біріншіліктеріне қатысып, 390 алтын, 384 күміс, 377 қола медальға қол жеткізген. Ал Азия чемпионаттарында 19 алтын, 15 күміс және 19 қола медальге ие болды. Осы мерзім аралығында спорт түрлері бойынша өткен Әлем чемпионаттары мен Кубоктарында 16 алтын, 8 күміс және 7 қола медаль жеңіп алды. Отырыста жиынға қатысушылар саладағы бүгінде өзекті болып тұрған мәселелердің жайын жеткізді. Нақтырақ айтқанда, олар ауылдық жерлерде жүйелі түрде дене шынықтыру және спортпен шұғылдануға балалар мен жастардың жеткіліксіз дәрежеде тартылуына алаңдады. Сондай-ақ, облыстағы спорт нысандарының тиісті құралдармен жабдықталуының төмендігіне байланысты аталған нысандар мен ғимараттарға қолжетімділіктің жоқтығы және спорт алаңшаларының аздығына наза аударды. Сондай-ақ, спорт жанашырлары басқармаға қарасты облыстық дәрігерлік-дене шынықтыру диспансерінің медициналық жабдықтармен, фармакологиялық және қалпына келтіру құралдарымен жабдықталмауын, оларды емдеуде күндізгі стационардың болмауын сөз етті.

Баяндамашыларды мұқият тыңдаған облыс әкімі спорттағы бірқатар салалар бойынша ойын білдіріп, тапсырмалар берді. Спорт нысандарының жоспарлы түрде өз мерзімінде салынатынын ескерткен Ж.Түймебаев қолдағы бар спорт ғимараттарын тиімді пайдаланып, үйірмелердің бағасын қолжетімді ету арқылы оған жастарды көптеп тартуды жүктеді. Аймақ басшысы, әсіресе, спорттың көркем гимнастика түріне қызығушылық білдіріп, жас жеткіншектердің бойына эстетикалық тұрғыдан сұлу саналатын осынау спорттың негізін қалауды тапсырды. Облыс әкімі назарға алған тағы бір мәселе — 4 жыл сайын өтетін халықаралық жазғы Олимпиада ойындарына жарты жыл қалғанда емес, осы бастан дайындалу қажеттігі еді. Бұл ретте, ол ел Тәуелсіздігінің 25 жылдығына түрлі шаралар өткізіп, оның ішінде, ауыл, аймақтардан жарыстар ұйымдастыру арқылы жас таланттарды іздеуді тапсырды. Ал бұқаралық спортты дамытуда өңір басшысы көп қабатты тұрғын үйлердің жобалық сметалық құнын әзірлегенде үй алдынан салынатын құрылғылармен қамтамасыз етілген алаңқайлардың да міндетті түрде кіруі керектігін ескертті. Сонымен бірге, әкім болашақта облыс орталығынан жаңа спорт сарайы мен стадион салыну қажеттігіне көңіл бөліп, бұл жобаны алдағы уақытта қарастыратынын жеткізді.