Бүгін Оңтүстік Қазақстан облысының әкімдігінде аудан, қала әкімдерімен селекторлық жиын өтті, деп хабарлайды ОҚО әкімінің баспасөз қызметі. Өңір басшысы Жансейіт Түймебаевтың төрағалығымен өткен мәжілісте облыс әкімінің орынбасарлары, әкім аппараты және облыстық басқарма басшылары қатысты.
Күн тәртібінде, 2016 жылдың 10 айының қорытындысы мен бюджеттің орындалуы және «Нұрлы жол» бағдарламасының іске асуы туралы мәселелер қаралды.
Бірінші мәселе бойынша сөз алған облыстық қаржы басқармасының басшысы К.Мендебаев осы жылдың 10 айында жергілікті бюджетке түсетін салықтар мен басқа да түсімдердің жоспары 108,2%-ға орындалғанын немесе 6,6 млрд.теңге артық түскенін мәлімдеді.
Оның айтуынша, есепті кезеңде барлық аудан, қалаларда кірістер бойынша жоспар асыра орындалған. Десе де, бірқатар аудан, қалалар бойынша кейбір жобалар аясында игерілмеген қаржылар бар. Бұл өз кезегінде, бюджеттік бағдарламаларда қаралған шығындарды уақтылы қаржыландыруға кері әсерін тигізеді деді ол.
Басқарма басшысы облыс бойынша бюджет қаржысы 97 пайызға игерілгенін айтып, «Нұрлы жол», «Жұмыспен қамту 2020», «Бизнестің жол картасы 2020» бағдарламаларына бөлінген қаржылардың игерілуіне күнделікті бақылауды күшейту қажеттігіне тоқталды.
Жиында «Нұрлы жол» бағдарламасының орындалуы бойынша мәлімдеме жасаған облыстық құрылыс басқармасының басшысы С.Полатов Ұлттық қор есебінен облыста жүргізілетін 50 нысан құрылысына 20 194,7 млн. теңге қаржы бөлінгенін жеткізді. Атап айтқанда, олар — 26 мектеп, 1 балабақша, 11 инфрақұрылым, 11 тұрғын-үй, 1 жатақхана нысандарының құрылысы.
Сонымен бірге, С.Полатов білім беру саласы бойынша осы жылы құрылысы жаңадан жоспарланған 17 нысан құрылысының 5-уі жоспарланған өндірістік кестеден кешігіп жатқанын жеткізді. Олар — Сайрам, Сарыағаш, Шардара аудандары мен Шымкент қаласындағы мектептер.
Сонымен қатар, баяндамашы Шымкенттегі «Тұрғынүйқұрылысжинақбанкі» АҚ-ы арқылы салынып жатқан кредиттік 11 үйдің құрылысы мен «Жұмыспен қамту-2020» бағдарламасы бойынша әкімшілік-іскерлік орталығындағы 9 қабатты 1 жатақхананың құрылысы туралы айтып, құрылыс жоспарлы кестеге сай жүргізіліп жатқанын жеткізді.
Өз кезегінде, салаға қатысты сөз алған облыстық энергетика және тұрғын үй – коммуналдық шаруашылық басқармасының басшысы М.Марайым бөлінген 4 048297,0 мың теңгенің 97 пайызы игерілгенін хабарлады. Ал ақшаны уақытылы ұқсатпаған нысандар – «Бизнестің жол картасы 2020» бағдарламасы бойынша жұмыстар жүргізіліп жатқан Шымкенттегі Тассай индустриалдық аймағының құрылысы мен Мақтаралдағы логистикалық орталығының инженерлік коммуникация құрылысы, Түлкібастағы демалыс аймағын газбен қамтамасыз ету жайы және Түркістандағы логистикалық орталықтың құрылысы екен.
Жиынды қорытындылаған аймақ басшысы Ж.Түймебаев қаржыны кестеге сәйкес игере алмай отырған аудан, қала әкімдері жұмысты барынша жеделдетуі қажеттігін айтып, оның себебін нақтылап, түсініктеме беруі керектігін тапсырды. Сөз соңында Жансейіт Қансейітұлы міндетті тапсырмаларды орындамаған шенділердің тәртіптік жауапкершілікке тартылатынын да ескертті.