Бүгін Астанада жыл сайынғы «Қазақстанның үздік тауары» өңірлік көрме-конкурсы өтті. Шараның ашылуына Астана қаласы әкімінің орынбасары Малика Бектұрова және өңірлік кәсіпкерлер палатасының басшысы Ғани Тасмағанбетов қатысты, деп хабарлайды қалалық әкімдіктің баспасөз қызметі.

Көрме отандық өнімнің сапасын арттыруға бағытталған қызметті жандандыру, Қазақстан нарығын жоғары сапалы және бәсекеге қабілетті өніммен толықтыруға жәрдемдесуге бағытталған.

Көрме-конкурсқа түрлі саладағы елордалық өндіруші кәсіпкерлер қатысты. Конкурс үш номинация бойынша өтті: «Өндірістік мақсаттағы үздік тауарлар»; «Халық тұтынатын үздік тауарлар»; «Үздік азық-түлік тауарлары».

«Өндірістік мақсаттағы үздік тауарлар» санатында шыныдан бұйымдар жасайтын «Елордалық шыны компаниясы» ЖШС үздік атанды. Сүт өнімдерін шығаратын «Банур-НС» ЖШС «Үздік азық-түлік тауарлары» санатында көш бастады. «Халық тұтынатын үздік тауарлар» санатында жарық диодты өнімдер жасайтын «Led solution» ЖШС топ жарды.

Өңірлік конкурс жеңімпаздары жыл соңында өтетін «Қазақстанның үздік тауары» республикалық байқауына жолдама алды.

Айта кетейік, шағын және орта бизнес елорданы дамытуда алдыңғы қатарда, бұған негізгі көрсеткіштер дәлел болады. 2015 жылы шағын және орта кәсіпкерлік субъектілері шығарған өнім көлемі 3 215,8  млрд теңгені құрады. ШОБ саласында 288 мың адам жұмыс істейді. ЖӨӨ құрылымындағы ШОБ үлесі 60% жуық және республика бойынша өңірлер арасында көш бастап тұр.