Елордада ұлттық спорт түрлерінен алғаш рет өткен «Астана жұлдызы» республикалық турнирінде «Қазанат» атшабарының маңына қонған қазақ ауылын Астана әкімі Әсет Исекешев аралап көрді, деп жазады қалалық әкімдіктің баспасөз қызметі.

Бұл этноауылда 13 киіз үй тігіліп, жиналған қауымға ұлттық тағам түрлерінен дәм ұсынылды.

Көпшілік алтыбақан теуіп, асық атып, ләңгі ойнап, сауық құрды. Мергендігін сынап көрген елорда басшысы Әсет Исекешев садақпен нысана көздеп, дәл тигізді.

Астана әкімі қарапайым халыққа атқа мінуді үйренуге, аударыспақ, асық ату, тоғызқұмалақ ойнауға және ұлттық спорт түрлерімен машықтануға жағдай жасалатынын, алдағы екі жылда бұқаралық спортты дамыту мақсатында қала бойынша 22 спорт алаңы салынатынын айтты.