Елордада әлеуметтік тақырыптағы сурет байқауына өтініш қабылдау аяқталды. Шығармашылық конкурсқа 18 өтініш түсіп, 25 сурет ұсынылған, деп хабарлайды қалалық әкімдіктің баспасөз қызметі.

Қатысушылар А3 форматында және графикалық үлгіде орындалған жұмыстарына түрлі тақырыптарды арқау еткен, соның ішінде, ұлттық мәдениетті қолдау, отансүйгіштікті насихаттау, денсаулық сқатау және білім беру мәселелері және т.б. бар. Конкурсанттарға қойылған тағы бір талап жұмыстарында Қазақстан Республикасы Тәуелсіздігінің 25 жылдығына және ЭКСПО-2017 көрмесін өткізуге арналған элементтерді пайдалану болды.

Байқауға Астанада тұратын, білім алатын немесе жұмыс істейтін адамдар қатысады. Ең жас суретшінің жасы  9-да болса, ең ересегі – 25-те.

Жеңімпаздарды арнайы комиссияның мүшелері іріктейді, олар бір апта бойы үздік жұмыстарды таңдайтын болады.

Байқау қорытындысы 7 қарашада шығарылып, біздің сайтта жарияланады. Жеңімпаздарға дипломдар мен бағалы сыйлықтар табыс етіледі, ал ең үздік жұмыстар аталған тақырыптар бойынша жарнамалық конструкцияларды дайындауда пайдаланылып, қала көшелеріне орналастырылады.