Ақтөбеде 80 жас шахматшы қатысқан жарыс өтті. ХVІІ облыс спартакиадаға облыстың аудандарынан және Ақтөбе қаласының мектептерінен әуесқой ойыншылар жиналды.
Бұл жарысты ұйымдастырып отырған «Ақтөбе-дарын» өңірлік ғылыми-тәжірибелік қосымша білім беру орталығының мәліметі бойынша, жыл өткен сайын зияткерлік ойын түріне қызығушы балалар қатары да артып отыр. Мәселен, биылғы жарысқа өткен жылғыдан гөрі қатысқан оқушылар көп. Әрі олар шахмат ойнағалы бері есте сақтау қабілеті артып, сабақта есепті оңай шеше бастағандарын айтады.
Ал ұйымдастырушылардың айтуынша, облыс мектептерінде жаппай шахмат үйірмелерінің ашылуы оқушылардың қызығушылығын туғызып, шахмат ойнайтын баллаар санын көбейткен. Жалпы, ел мектептерінде шахмат үйірмелерін түгел ашу туралы тапсырманы осыдан 5 жыл бұрын Елбасы берген болатын. Сол уақыттан бері Ақтөбе облысының барлық дерлік мектептерінде бұл үйірмелер жұмыс жасап тұр.
Осы жолғы жарыстың жеңімпаздарынан облыстың құрама командасы жасақталады. Олар республкалық жас шахматшылар жарысында өңірдің намысын қорғайтын болады.