Ел тәуелсіздігінің 25 жылдығын мерекелеу шеңберінде Астана әкімі Әсет Исекешев елорданың жас дарындарымен кездесті, деп хабарлайды қалалық әкімдіктің баспасөз қызметі. «Дарынды балалар — ұлт байлығы» кездесуінің мақсаты — оқушылардың интеллектуалды-шығармашылық қабілеттерін дамытуға ықпал ету, елордалық білім саласында белсенділік таныту ынтасын қалыптастыруға жағдай жасау, көшбасшылық үлгісін, креативтілікті және патриотизмді насихаттау.

Кездесуде оқушылар өз ойларын ортаға еркін тастап, жетістіктерін айтып, келешек жоспарларымен бөлісті. Мысалы, «Нұр орда» мектебінің оқушылары робототехника саласында креативтілік танытты. Сегізінші сынып оқушылары түс гаммаларын сұрыптайтын роботтарды және екі минутта кубик жинайтын робот жасап шығарды. №75 мектеп-гимназияның 9-сынып оқушысы Самат Кәмілжанның жобасы да айрықша, ол қоқыс өңдейтін шағын зауыт жасаған.

«Қазір оқу процесіне инновациялық технологиялар енгізілген, 42 робототехника кабинетін жарақтауға қаржы бөлінді. Сондай-ақ, «Смарт-мектеп» жобасы жұмыс істеуде. Көрмеде робототехника бойынша қызықты жұмыстарды көрдім де, таң қалдым.  Біздің оқушылар идеялардың ерекшелігі жөнінен студенттердің келесі буынын басып озды. Кездесу барысында үздік интеллектуалдық жобаларды ынталандыру керек деген ой келді. Әкімдік инновациялар саласындағы үздік жұмыстарға грант түрінде 10 млн теңге бөлетін болады. Бір жыл бойы 5 млн-нан 5 грант және 500 мыңнан 10 грант бөлінеді. Мен жаңа ғана көрген жұмыстарға гранттар беріледі», — деп атап көрсетті Әсет Исекешев.

Сондай-ақ, Астана әкімі 2017 жылы белгілі бір мамандықтарға қолдау көрсетілетін 10 инновациялық мектеп құру жоспарланғанын айтты. Елордада білім алып жатқан 94 мектеп оқушыларының 68 800-і олимпиадаларға, ғылыми және интеллектуалдық жарыстарға қатысады, бұл оқушылардың жалпы санының 67% құрайды. 10 жыл бойы елордалық білім жүйесі оқушыларының командасы республикалық олимпиадаларда және ғылыми жарыстарда 1-ші жалпыкомандалық орын алып, «Үздік команда» атағына ие болған. Елорданың дарынды балалары халықаралық деңгейде де жоғары нәтижелер көрсетуде. 2015-2016 оқу жылында елордалық оқушылар халықаралық олимпиадаларда және ғылыми жарыстарда 268 медаль мен грамоталарға ие болды: соның ішінде алтын — 61, күміс — 92, қола — 102. Осы бағыттағы жұмыс жалғасуда.