Алматы облысында қант қызылшасын жинау науқаны өтуде. Ал 28 қыркүйектен бастап қант зауыты қант қызылшасын қабылдай бастады. Биылғы жылы Жетісу қызылшашыларының мақсаты 12 000 тонна қант өндіру болып отыр.
Алматы облысының қант қызылшасын өсіруші шаруалары биыл осы өнімнің егілген әр гектарынан 700 -750 центнерден өнім жинап, рекордтық көрсеткішке жетіп жатқандығын айтқан Алматы облыстық ауылшаруашылығы басқармасы басшысының орынбасары Құдайберген Бекбосынов:
— Елбасының берген тапсырмасына сәйкес және мемлекеттік қолдаудың арқасында, жасалып жатқан шаралар нәтижесінде биыл Алматы облысында 4 000 га жерге қант қызылшасы себілді. Былтыр ол 1200 га болатын. Сонымен қатар, осы қант қызылшасын өңдейтін зауыттарды қаржыландыру шаралары шешілді. Қазір зауыттардың қант қызылшасын қабылдау 6000 теңгеден 14 500 теңгеге дейін көтерілді. Бізде қант қызылшасы Ақсу, Көксу, Сарқан, Қаратал және Ескелді аудандарына егілген болатын. Бүгінгі күні қант зауыты 2800 тоннадай қант қызылшасын қабылдап алды, — деді.
Айта кетейік, ҚР Президенті Нұрсұлтан Назарбаевтың Алматы облысына жасаған іс сапары кезінде аймаққа қант қызылшасы бойынша бұрынғы атағын қайтару тапсырмасы қойылған болатын. Осы мақсатта өңір басшылығы сәйкесінше жұмыстар жүргізіп, қант қызылшасын өсіретін шаруаларға 240 млн теңге мемлекеттік субсидия бөліп, арнайы техника, сапалы тұқым, жанар жағармай сатып алуларына жағдай жасаған болатын. Бүгінгі күні есіл еңбек еш кетпей, облыс оның нәтижесін көріп отыр.
