Қазақстанда көлік жасау саласы мемлекеттің тікелей қолдауының арқасында қарқынды дамып келеді. Бұл туралы бүгін ҚР Президенті жанындағы ОКҚ брифингте ҚР ИДМ Индустриялды даму және өнеркәсіптік қауіпсіздік комитеті төрғасының орынбасары Тимур Нұрашев мәлім етті.
— Қазіргі кезде Қазақстанда 7 автомобиль құрастыру зауыты жұмыс істейді. Олардың ішінде «Азия авто», «Сарыарқа автопром», «Хюндай», «Семаз», «Камаз инжиниринг», «Агромашxолдинг» сынды ірі кәсіпорындар қарқынды дамып келеді. Аталған зауыттарда 2014 жылы 40 мыңнан астам автомобиль шығарылды. Бұл кәсіпорындарда көліктердің әр түрлі маркасы құрастырылады. Мәселен, жеңіл автомобильдердің — 42, жүк таситын автомобильдердің — 21, арнайы автомобильдердің — 18, тартқыштардың — 3 және автобустардың 3 моделі шығарылады» деді Т.Нұрашев брифинг барысында.
Сонымен қатар, Т.Нұрашев машина құрастыру саласында тағы 2 үлкен жобаны қолға алу көзделіп отырғанын атап өтті. Оның сөзіне қарағанда, аталған жобалар жүзеге асырылғаннан кейін елімізде жылына 200 мың автомобиль шығарылатын болады.