Бүгін Алматы қаласындағы Ұлттық кітапханада «Мұстафа Шоқай: саясаткер және ғалым» атты халықаралық ғылыми конференция өз жұмысын бастады. Бұл туралы Ұлттық кітапхананың баспасөз қызметі хабарлады.
ҚР Білім және ғылым министрлігі Ғылым комитетінің Р.Б.Сүлейменов атындағы Шығыстану институтының ұйымдастырған бұл іс-шара әлемнің түрлі ғылыми орталықтардағы шоқайтану саласындағы жетістіктермен танысу, көрнекті мемлекет қайраткері, ойшыл, көсемсөз шеберінің шығармашылық мұрасын кең ғылыми айналымға енгізу және көпшілікке жеткізу мақсатында өтіп отыр.
«Халықаралық конференция барысында көтерілетін мәселелер тың зерттеулерге түрткі болып, ХХ ғасырдың басындағы түркі-мұсылман халықтары тарихының күрделі мәселелерінің күрмеуін шешуде өзіндік орын алары сөзсіз. Мұстафа Шоқайдың ғылыми мұрасын көпшілік назарына алып шығу – халқымыздың отансүйгіштік санасын шарықтатып, біртұтас қазақстандық қоғамның қалыптасуына септігін тигізеді» делінген хабарламада.
Конференция жұмысына Қазақстан, Өзбекстан, Ресей, Ұлыбритания, Франция және Түркияның танымал ғалымдары қатысуда.
Конференция аясында М.Шоқайдың он екі томдық Шығармаларының толық жинағы мен ҚР Ұлттық кітапханасы дайындаған «Мұстафа Шоқай» атты библиографиялық көрсеткішінің тұсаукесерлері өтеді деп жоспарланып отыр.