«Алтын асық» бағдарламасы – қой шаруашылығын қолға алам деушілер үшін үлкен мүмкіндік.
Бүгінде отандық фермерлер бұл жобаның тиімділігін көріп үлгерді. Мәселен, Жамбыл облысы бойынша бұл бағдарлама арқылы мал басын көбейткен жанның бірі – Сәдуақас Дүйсенов. Ол бұл іспен ондаған жыл бойы айналысып келеді. Тәжірибелі шаруаның айтуынша, «Алтын асық» бағдарламасы уақ мал тұқымын көбейтіп, ет экспортына жол ашады.
Сарысу ауданындағы «Әсем» шаруақожалығы бірнеше жылдан бері қой өсіру бағытында жұмыс істейді. Сәдуақас Дүйсенов «Аграрлық несие корпорациясы» арқылы 14%-бен несие алып, 300-ге жуық қой, бірнеше асылтұқымды қошқар сатып алды. Жоспары жүзеге асса, несие үстемақысының 7%-ын мемлекет субсидиялап береді.
Сәдуақас Дүйсенов, шаруақожалық төрағасы:
— 2 жыл демалысы бар. Екі жылда малды ұрықтандырып, төл алсақ деп отырмыз. Ол екі жылда өсіп, төлдің өзі төл беруге жетеді. Соның арқасында мал басы көбеймей ме? Бұл бағдарлама – мал өсірем, қой өсірем дегенге өте тиімді бағдарлама.
Қазір шаруа қой үстіне қой қосып, отарға айналдырды. Ендігі мақсаты мал басын асылдандыруға ден қоймақ. Ол үшін мұнда тәжірибелі бірнеше шопан жұмысқа тартылған. Тіпті кейбіреуі отбасымен келіп, еңбек етіп жүр.
Жалпы биыл Жамбыл облысы бойынша бағдарлама шеңберінде 22 мың бас қой сатып алу жоспарланған. Бүгінгі күнге оның 81%-дан астамы орындалды.