«Қазпочта» АҚ клиенттері үшін үй телефоны арқылы сәлемдеменің жеткенін ескертетін жаңа қызмет сервисі іске қосылды. Сервис еліміздің барлық облыстық орталықтарында және Астана мен Алматы қалаларында қосылған.
«Үй телефоны арқылы автоматты түрде қоңырау шалу қызметі клиентке сәлемдеменің түрін, трек нөмірін және қабылдауға болатын бөлімшенің мекенжайын хабарлайды. Ақпаратты қайталау үшін «1» санын басу қажет. Жүйе автоматты түрде клиенттерге тәулігіне 3 рет, жұмыс күндері сағат 8:00 ден 21:00-ге дейін, ал демалыс күндері 10:00 ден 21:00-ге дейін, дауыстық хабарламаны қабылдағанша қоңырау шалады» — дейді «Қазпочта» АҚ баспасөз қызметінің жетекшісі Байрам Азизов.
Айта өтейік, қазіргі таңда клиенттер 22 мыңнан астам қоңырау қабылдаған, олардың 2 мыңнан астамы қайталанып тыңдалды. Сонымен қатар, 2014 жылдың желтоқсан айынан бастап, Қазпочта клиенттердің сәлемдемелері жеткені жайлы SMS-хабарламалар арқылы ескертуді бастады. Қызмет қосылғаннан бастап 5 миллионнан астам SMS жіберілген.