Атыраулық 13 жастағы Кирилл Литвинов пен 27 жастағы Эдуард Қабдешев Португалияда өткен пауэрлифтингтен әлем чемпионатында Қазақстан құрамасы сапында бірнеше алтын және бір күміс медаль иеленді.
Кирилл үшін бұл әлемдік аренадағы дебют. Жас спортшы 13-15 жас дәрежесі бойынша бірнеше аталымда әлем чемпионы атанды (салмақ дәрежесі 52 келіге дейін). Сонымен қатар, Кирилл зілтемірді жатып көтеруден (72,5 келі), зілтемірді тізеге дейін көтеруден (145 келі) және күштік үшсайыстан әлем рекордын орнатты.
Эдуард 110 келіге дейін салмақта өнер көрсетті. «Ол басты қарсыласымен бірдей нәтиже көрсеткен, алайда оның салмағы 107,4 келі, қарсыласынікі 107 келі болғандықтан, спортшымыз екінші орын алды», — деді бапкер Александр Литвинов.
Чемпионатқа 36 елден 400-ден аса атлет қатысты. Қазақстан намысын 46 спортшы қорғады. Жалпыкомандалық есепте Қазақстан бірінші орын алды.