Бүгін Астанадағы «Көрме» орталығында Қазақстандағы үздік отандық тауарлардың көрмесі ашылды.
«120-дан астам өңірлердің үздік тауарлары бойынша номинант компаниялар бүгін өз өнімдерін ұсынып отыр. Сонымен қатар өздері өндірген өнімдерін көрсетуге ниет білдірген қосымша 80-нен астам компания келіп отыр. Атап айтқанда, бүгін көрмеде 200-ден астам экспозициялар көпшілік назарына ұсынылған»,-деді «Атамекен» Ұлттық кәсіпкерлер палатасының басқарма төрағасы Абылай Мырзахметов.
Айта кетейік, көрмеде тауарларын ұсынған кәсіпорындар «Қазақстанның үздік тауары» республикалық байқауына қатысқан. Байқау комиссиясының шешімімен республикалық көрме-байқауына қатысушылар үш аталым бойынша іріктелінді.
Бірнеше жылдан бері ұйымдастырылып отырған «Қазақстанның үздік тауары» байқауына жалпы бес мыңнан астам компания қатысқан екен.