Алдағы жылы Тәуелсіз мемлекеттер достастығына 25 жыл толмақ. Келер жылы ұйымға төрағалық ету құқығына ие болған Қырғызстанның бұл ретте сыртқы саясаттағы беделін арттыруға тамаша мүмкіндік бар. Қырғыз елі үшін интеграциялық әрекеттерді қарқынды жүргізіп, қауіпсіздікті нығайту басты қағидалардың бірі болып қала бермек.
Тәуелсіз мемлекеттер достастығы ұйымының басты ерекшелігі сол, мұнда әр мемлекет тиімді әрекет жасап, тығырықтан шығар жолды бірлесе іздеуді мұрат еткен. Экономикалық және интеграциялық бағытта жұмыла жұдырық болған ұйымға жақында 25 жыл толмақ. Мұнда тәуелсіздігін ту еткен барша мемлекет үшін қауіпсіздік мәселесі басты орында екендігі айтпаса да түсінікті.
Әлемде болып жатқан дағдарыс салдары барлық мемлекетке әсер еткені белгілі. Шетелде болып жатқан түрлі шиеленістер ТМД-ға мүше елдердің одан әрі бірлесе жұмыс істеуіне септігін тигізді. Ал алдағы жылы Бішкекте өтетін ТМД мемлекеттері басшыларының жиыны көптеген шешімін таппай тұрған сауалдарға жауап беретініне күмән жоқ.