Еліміздегі еңбектеген баладан еңкейген қартқа дейін тыңдайтын топтардың бірі — көпшіліктің көзайымына айналған «МузАрт» тобы десек, ағат болмас.

Біздің елімізде бір рет жарқ етіп, ертесіне-ақ ұмыт болып жататын ән де, әншілер де аз емес. Дегенмен, қазіргі таңда, қазақ эстрадасындағы әншілердің көпшілігі өздерінің әндерін ертеңгі ұрпаққа асыл мұра болып қалу үшін көп еңбекті қажет ететіндігін жақсы біледі. Осы мақсатта, өзге топтардың арасынан «МузАрт» тобының суырылып алға шығып, үнемі ізденіс үстінде жүретіндігін айтпай кету мүмкін емес.

Заман ағымына ілесіп жүретін топ мүшелері жуырда ұялы қондырғыларға арналған «Ұлы дала» альбомын ел назарына ұсынды. Мұндай қондырғы елімізде жарыққа алғаш рет шығып отыр. Оған бірінші болып «МузАрт» тобының ән жинағы енді.

Бұл Smart Album-ды App Store және Play Market-тен жүктеуге болады. Енді дүкендерге бармай-ақ, үйде отырып та осындай ән жинақты сатып ала аласыз. ХХІ ғасыр ғылым мен техниканың заманы болғандықтан бұл қазақ өнерінің кең көлемде насихатталуына үлкен мүмкіндік.