Ауыр атлетикадан екі дүркін Олимпиада, төрт дүркін әлем чемпионы, Қазақстандық зілтемірші Илья Ильин «NewTimes.kz»-ке берген сұхбатында өзінің спорттық мансабын қашан аяқтайтыны туралы айтты.
— Илья, сұхбат беруге уақыт тапқаныңыз үшін үлкен рахмет. Алдымен өткен жылды қорытындылай кетсеңіз.
— 2015 жыл мен үшін табысты болды. Қоржынымызда Грозный қаласында өткен РФ президенті кубогының алтын медалі бар. Оған қоса, серпе көтеру мен қос жаттығу қорытындысы бойынша рекорд тіркедім. Бұл жетістіктермен мақтануға болады.
Ал жылдың аяғында Философия докторы атағын қорғадым. Өзімнің ғылыми жұмысымда мен жоғары деңгейдегі кәсіби зілтеміршілерді даярлау туралы мәселе көтердім. Қажетті ақпаратты табу үшін көп күш жұмсалды. Бұнда менің жеке тәжірибем де келтірілген. Аталмыш әдіс болашақта өз пайдасын береді деген сенімдемін.
— Сіздің оқушыларыңыз бар ма?
— Қазақстанның Ауыр атлетикадан ерлер құрамасы командасының капитаны болғандықтан, мен әр спортшыға көмектесіп тұрамын, бағыт көрсетіп, жөн сілтеп дегендей. Кейде тіпті спортшыларды дайындау бойынша ұйымдастырушылық міндеттерді атқаруға тура келеді, оның ішінде жалақы, жұмыспен қамтамасыз ету, сауықтыру және т.б.
Ал өзімнің алғашқы бапкер ретінде жетістігім деп 2015 жылы Азия Чемпионатында Сыбай Рүстемнің өнер көрсетіп, алтын медальға қол жеткізуін айтар едім. Рүстемді дайындауға мен белсене қатыстым. Оған қоса менің жетекшілерімнің де (Е. Болтаев және Т. Бектемиров) қосқан үлесі зор. Бұл спортшыға біз үлкен үміт артып отырмыз.
— Алдағы уақыттағы жоспарларыңызбен бөліссеңіз.
—Бұл сұрақтың жауабы біреу – Риода өтетін Олимпиада ойындарына дайындық. Біз үшін тағы бір сынақ болмақ. Бірақ еліміздің спортшылары Олимпиада ойындарында сәтті өнер көрсетеді деген үміттеміз. Әрқайсымыз, оның ішінде мен де алда қойылған мақсаттарға жету үшін бар күшімізді саламыз.
— Өзіңіздің спорттық мансабыңызды аяқтауды қай уақытқа жоспарлап отырсыз?
— 2020 жылы Токио қаласында өтетін олимпиада ойындарына қатысқаннан кейін, 32 жасымда өзімнің спорттық мансабымды аяқтауды жоспарлап отырмын. Бірақ одан кейін де менің өмірімде спорт басты орында тұрады деген ойдамын.
— Сұхбатыңызға рахмет!