Бүгін Астана қаласы жастар саясаты мәселелері басқармасының қолдауымен «Нұр Отан» партиясы «Жас Отан» жастар қанатының ұйымдастыруымен «Жастар Жалыны – 2016» атты шығармашыл жастар фестивалінің ресми ашылу салтанаты өтті. Дәстүрлі іс-шара Қазақстан Республикасының 25 жылдығына орай ұйымдастырылып отыр.

Шараның мақсаты — жастардың азаматтық және шығармашылық белсенділігін арттыру, дарынды жастарды анықтау және тәуелсіздік тағылымын таныта отырып, патриоттық рухта тәрбиелеу.

Фестивальға елорданың 12 жоғары және 14 кәсіптік-техникалық оқу орындарынан 1000-нан аса жас қатысады деп жоспарлануда.

Еске сала кетейік, «Жастар жалыны фестивалі» 2013 жылы бастау алған болатын. Содан бері Астаналық оқу орындарының жас таланттарын бір сахна төрінде біріктірген  фестивалді өткізу дәстүрге айналды. Алайда,  жыл сайын фестиваль жаңа мүмкіндіктерімен, қызықты номинацияларымен ерекшеленеді.

Биыл «Жастар жалыны – 2016» фестивалінің үздіктері «Эстрадалық ән байқауы», «Ең үздік волонтерлік жоба», «Ең үздік видеоролик», «Ең үздік студенттік клуб», «Квест», «Не? Қайда? Қашан?», «Халық биі және қазіргі заманғы би», «Ең үздік жанкүйерлер байқауы», «Авторлық оқу»  және «Музыка аспаптарында ойнау» тәріздес 10 номинация бойынша анықталатын болады.

Фестивальдің қорытынды гала-концерті 13 сәуір күні астаналық Конгресс-Холл концерт-залында өтеді.