Қайрат Нұртастың отбасымен етене жақын араласатын Сиви Махмұди әншінің кезекті туындысының құпияларымен бөлісті. Ол фильмде Қайрат Нұртастың әйелі мен төрт баласының ойнайтынын айтты.
Тілшілермен тілдесуге қолы тимей жүрген Қайрат Нұртас жаңа бейнебаян түсіріп жатыр. Аталған бейнебаянда басты рөлді халық күткендей жұбайы емес, белгісіз сұлу сомдайды. Бұдан кейін әнші түсірілім жұмыстары шілде айына жоспарланған фильмге түспек.
“Киноға кірісудеміз. Қазір сценарийі жазылып жатыр. Оны екі ай бойы жазамыз деп жоспарлаған болатынбыз. Көзді ашып-жұмғанша бір айы өтіп кетті. Шілде айында түсірсек, қараша-желтоқсан айларында көрермен назарына ұсынамыз. Бұл туындыда Қайрат Нұртас басқа қырынан танылады. Ал басқа құпияларды әзірге айтпай қоя тұрайын”, – дейді Гүлзира Айдарбекова.
Продюсер жасырғанымен, бұл құпияны өнер жұлдыздары жақсы білетін болып шықты. Қайрат Нұртастың отбасымен етене жақын араласатын Сиви фильмге кімнің, қалай түсіп жатқанын айтып берді.
“Көп жылдан бері жасырып келген соң өзгеше етіп ашқысы келеді. Гүлзира апамыз халықпен таныссын деген оймен кино түсіріп жатыр. Мұнымен қатар, ақша жинасақ деген де ойлары бар. Сонша жасырған соң еңбектері еш кетпеуі керек қой. Құдай қаласа, кинода жұбайы мен төрт баласы ойнайды. Басты рөлді Қайраттың әйелі мен төрт бала-шағасы сомдайды”, – дейді Сиви Махмұди.
Сиви Қайраттың әйелінің бұл рөлді алып шыға алатынына толықтай сенімді.
Әнші 2013 жылы “Өкініш” атты өмірбаяндық туынды ұсынған. Аталған фильмде әке-шешесі мен бауырлары, өнердегі достары ойнаған болатын.