Елордалық құтқарушылар «Қауіпсіз демалыс» қалалық профилактикалық акциясын өткізді. Акция жазғы демалыстың басталуына орайластырылып, демалыс кезінде балалардың қауіпсіздігін қамтамасыз етуге арналған, деп хабарлайды қалалық әкімдіктің баспасөз қызметі.

Өрт сөндірушілер, құтқарушылар мен сүңгуірлер балаларға өрт сөндіру техникасын, жабдықтарды көрсетіп, ашық суда өзін қалай ұстау керектігі туралы ережелермен және алғашқы көмек көрсету жолдарымен таныстырды. Оқыту конкурстары мен викториналарға жүздеген астаналық бала қатысты.

Жазғы демалыс кезінде балалардың отпен ойнауы салдарынан өрт шығу қаупі, су қоймаларында қайғылы жағдайлардың болуы артады. Өткен жылы өрт салдарынан алты бала көз жұмса, екеуі суға кеткен. Акцияның мақсаты осы сияқты төтенше жағдайлардың, балалардың өлімі мен жарақаттануының алдын алу, оларды өрт қауіпсіздігі ережелерімен, су қоймаларында өзін ұстану тәртібімен таныстыру болып табылады.