22 маусымда Қ. Қуанышбаев атындағы мемлекеттік академиялық қазақ музыкалық драма театрының сахнасында елорданың талантты жастары музыкалық сайысқа түседі. Байқау домбыра, қыл қобыз, прима қобыз бен жетіген номинациялары бойынша өтеді, деп хабарлайды қалалық әкімдіктің баспасөз қызметі.
— Байқау шығармашыл жастарды қолдауға, ұлттық салт-дәстүрлерімізді нығайтуға бағытталған. Сонымен қатар, бұл елордалық талантты жастарды анықтаудың жақсы мүмкіндігі, — деді Астана қаласының жастар саясаты мәселелері басқармасы басшысының м.а. Ербол Рыспаев.
Байқау жастарды тәрбиелеу кезінде ұлттық салт-дәстүрлерді кеңінен тарату және ұрпақтар сабақтастығы бойынша іс-шаралар аясында ұйымдастырылады. Шара барысында 14 пен 25 жас аралығындағы жастар ұлттық аспаптарда ойнау шеберлігін көрсетеді.