«Нұр Отан» партиясы Алматы облыстық филиалы мен Қазақстан халқы Ассамблеясының облыстағы хатшылығы ынтымақтастық жөніндегі меморандумға қол қойып, бірлескен іс-шаралар жоспарын бекітті.

Шараға партия белсенділері, облыстық Қазақстан халқы Ассамблеясының мүшелері, этно-мәдени бірлестік жетекшілері, облыстық партия филиалы жанындағы «Жас Отан» жастар қанаты және БАҚ өкілдері қатысты.

Алматы облыстық Қазақстан халқы Ассамблеясы төрағасының орынбасары, хатшылық меңгерушісі Ғ.Тұрсынбай: «Халық бірлігі мен қоғамдық келісім – елімізді өркендететін екі басты фактор. Мемлекет басшысы жас ұрпақтың болашағы үшін осы екі құндылықтың маңызын түсініп, оны сақтауға көп көңіл бөледі. Осы күнге дейін «Нұр Отан» партиясының облыстық филиалымен бірлесе жұмыс атқарып келеміз. Бүгінгі жұмыс жоспары осы ынтымағымызды одан ары жандандырады деп сенемін», — деді.

Бірлескен іс-шаралар жоспарында «Қазақстан-2050» стратегиясын тиімді жүзеге асыру, Президент ұсынған «Бес институционалдық реформаны іске асыру бойынша 100 нақты қадам» Ұлт жоспары мен «Әлем. ХХІ ғасыр» Манифесін ілгерілету, Тәуелсіздігіміздің 25 жылдығын насихаттау, сараптамалық және пікір алмасу алаңдарын ұйымдастыру, «Нұр Отан» партиясының қоғамдық қабылдау бөлмесінде  жүйелі түрде қабылдаулар  өткізу, әлеуметтік маңызы бар жобаларды жүзеге асыру көзделген.