Мемлекет басшысының тапсырмасымен Қазақстан Премьер-Министрі Кәрім Мәсімов жұмыс сапарымен Алматы облысында жүр.

Талдықорған қаласына келген Премьер-Министр әуежайдың жөндеу барысын қарап, авиациялық қауіпсіздік қызметінің жұмысына баға берді.

Сондай-ақ Кәрім Мәсімов Оңтүстік-Батыс тұрғын үй алабы құрылысының жобасымен танысты. Ағымдағы жылы мұнда жалпы аумағы 16,9 мың шаршы метр болатын төрт тұрғын үйді салу аяқталды, 705 пәтерлі бес коммуналдық үйдің құрылысы жалғасуда. Тұрғын үй алабында тоғыз балабақша, бес мектеп, емхана және басқа да бірқатар әлеуметтік маңызы бар нысандарды орналастыру жоспарланған.
Облыс әкімдігінің басшылығы Премьер-Министрді өңірдің әлеуметтік-экономикалық дамуы, инфрақұрылымдық және тұрғын үй құрылысы, агроөнеркәсіп кешені бағдарламаларын жүзеге асыру, газдандыру, халықты ауыз сумен қамтамсыз ету туралы ақпараттандырды.

Бұдан өзге, қайта салынған Жастарға қызмет көрсету орталығын аралау аясында К.Мәсімовтің жастар көшбасшыларымен кездесуі өтті, оның барысында жас буынның аса өзекті мәселелері, атап айтқанда жұмыспен қамту, кәсіпкерлікті қолдау, жастар қозғалыстарын дамыту перспективалары талқыланды.