«Сарыарқа» велотрегінде Қазақстанның белгілі балуандары күш сынасуда. Елорда күнін мерекелеу орай қазақ күресінен Қазақстан Республикасы Президентінің сыйлығына VI «Қазақстан барысы» республикалық турнирінің ақтық сыны басталды. Іріктеу кезеңінің жеңімпаздары Астанада бас жүлде «Тайтұяқты» сарапқа салады, деп хабарлайды қалалық әкімдіктің баспасөз қызметі.

Финалға еліміздің облыстарынан, Астана мен алматы қалаларынан 34 балуан қатысады. Биылғы жарыста «Қазақстан барысы» атанған үш балуан Ұлан Рысқұл, Айбек Нұғымаров және Бейбіт Ыстыбаев та бағын сынайды.

Ең жас балуан Маңғыстау облысының тумасы Нұрдәулет Жарылғапов 20 жаста, ал ең үлкені– Солтүстік Қазақстан облысының өкілі Дулат Алпысов 37-де.

Спортшылардың барлығы абсолюттік салмақта (90+кг) шеберлік байқасады.Жеңімпазға алтын «Тайтұяқ», жеңімпаздың белбеуі және ақшалай сыйлық табысталады.

Әдеттегідей, ұйымдастырушылар қазақ күресінің жанкүйерлеріне де тосын сый әзірледі. Көрермендер арасында автокөлік ұтысы өткізіледі.