Бүгінгі таңда Алматы облысында да жыл сайынғы жазғы шомылу маусымында адамдардың суға кету оқиғалары азаймай тұрғаны жасырын емес. Биылғы жыл басынан бері облыстың су айдындарында 38 адам суға батқан, соның ішінде 15-і бала. Ал жазғы маусымда 27 адам дәл осындай төтенше жағдайға ұрынған болса, оның 10-ы бала. Жедел құтқару жасағының құтқарушылары 120 адамның өмірін сақтап қалған. Бұл туралы Алматы облыстық өңірлік коммуникациялар қызметінде өткен брифинг барысында облыстық төтенше жағдайлар департаментінің «жедел құтқару жасағы» жетекшісі Сайлаубек Шарапиев айтты.

— Судағы төтенше жағдайлардың басты себептері азаматтардың күзетілмейтін, шомылуға арналмаған су айдындарында шомылуынан, судағы қауіпсіздік талаптарын білмеуінен және оларды ұстанбауынан, сондай-ақ, ішімдік ішіп алып суға қойып кетуінен, балалардың су жағасында ересектердің бақылауынсыз қалуынан болып отыр, — деді С. Шарапиев.

Жедел құтқару жасағына әлі де босаңсуға уақыт жоқ. Себебі, алда әлі шомылу маусымының үш аптасы бар.

Тұрғындардың немқұрайлылығынан облыстағы өрт қаупі де сейілмей тұр. Ағымдағы жылы өрт қаупі кезеңі сәуір айынан басталған. Содан бері 400-ге жуық өрт тіркелген. Өрт салдарынан болған материалдық шығын 30 млн. 180 мың теңгені құраған. Өкінішке қарай, адам өлімі де жоқ емес. 2016 жылғы «өрт қаупі кезеңінде» өрттен 9 адам қайтыс болса, оның 2-еуі бала.

Тілсіз жаудың ең көп орын алған жері тұрғын үй секторларында тіркелген. Бұл туралы облыстық төтенше жағдайлар департаменті өрт қауіпсіздігі саласындағы бақылау және профилактикалық қызмет басқармасы бастығы міндетін атқарушы, азаматтық қорғау капитаны Александр Пархоменко айтып берді. Әсіресе, балалардың отпен ойнау салдарынан болатын төтенше жағдайлар ең жиі тіркелетін көрінеді.

Орман-дала аумақтарындағы өрттердің басты себебі де тұрғындардың  отты бейберекет, сақтықсыз қолдану салдарынан болып отыр. Бүгінгі таңда Алматы облысы аумағында 265 га аумақты алып жатқан  құрғақ шөптер қызыл жалынға оранған. Сондай-ақ, 80,9 гектарда орналасқан 2 орман өрті тіркелген.