Jas.kz

ОҚО Кәсіпкерлік мектебінде ақпан айының 22 жұлдызынан бастап «Өркен старт-ап» жастар жобасының екінші оқу кезеңі басталды. Бұл туралы ОҚО әкімінің баспасөз қызметі хабарлады.

Аталған жобаның негізгі мақсаты облыс жастарының бойында кәсіпкерлікке деген құштарлығын арттыру және бизнес саласын жастар арасында белсенді насихаттау болып табылады. «Өркен старт-ап» жобасының қатысушысы болуға ОҚО тұрғындары 16-дан 29 дейінгі жас аралығындағы азаматтарға мүмкіндік берілген.

«Басты шарт — жасампаздыққа және жеке бизнесін дамытуға даяр болу», — дейді жоба үйлестірушісі Г.Вероцкая.

Болашақ бизнесмендердің даңғыл жолына бастама болатын жобаға ең белсенді 17 адам алғашқы қатысушы атанды.

Атырауда қоғам және мемлекет қайраткері, қазақ поэзиясының көрнекті тұлғасы Фариза Оңғарсынованың ескерткіші ашылады. Бұл туралы Атырау облысының әкімі Бақтықожа Ізмұхамбетовтің мәлімдемесіне сілтеме жасаған egemen.kz тілшісі хабарлады.

Қазақ поэзиясында ерекше орны бар Фариза Оңғарсынованың ескерткіші Атырау қаласындағы Сәтпаев даңғылында бой көтереді. Оның ескерткішінде ақын өлеңдерінің бірнеше шумағы жазылатындығы белгілі болып отыр.

«8 наурыз — Халықаралық әйелдер күні қарсаңында Фариза Оңғарсыноваға арналған ескерткіш ашылатын болады», — деп мәлім етті Атырау облысының әкімі Бақтықожа Ізмұхамбетов.

Елордада ҚР Денсаулық сақтау және әлеуметтік даму министрлігі мен елорда әкімдігі, сондай-ақ «Астана денсаулықты таңдайды» фармацевтикалық қауымдастығы бірлескен жобаны іске қосты. Жоба аясында дәріханалар дәрігерлердің ұсынысы болмаса, қолдану ұзақтығын, мөлшерлеуді білуді қажет ететін препараттарды сатпайды.

– Жобаның мақсаты – дәрілік заттарды рационалды пайдалану. Өкінішке орай, бүгінде көптеген препараттар еркін түрде сатылады, бұл халыққа белгілі бір қауіп төндіреді. Күн сайын әлемде жүздеген дәрі-дәрмек жасалады, оларды дұрыс пайдаланған жағдайда, ауруды жеңуге болады, ал керісінше жағдайда денсаулыққа ауыр зардап келтіреді, – деді ҚР Денсаулық сақтау және әлеуметтік даму министрлігі Медициналық және фармацевтикалық қызметті бақылау комитетінің Астана қаласы бойынша департаментінің басшысы Роза Қуанышбекова.

Оның айтуынша, рецептісіз дәрі-дәрмектерді сатып алу үшін бұрынғыдай дәрігердің ұсынысы қажет болмайды. Оған аурулардың жеңіл түрін емдеуге арналған препараттар жатады. Ал мөлшерлеу мен қолдану ұзақтығын білуді қажет ететін дәрі-дәрмектер астаналықтарға дәрігердің тағайындауынсыз сатылмайтын болады.

Бүгінгі таңда халықтың басым бөлігі дәрілерді таныстарының, әріптестерінің, туған-туыстарының ұсынысымен алады және сауалнамаға сәйкес елорда тұрғындарының 18–20% ғана дәрігердің кеңесіне құлақ асады.

Астана қаласының фармацевтикалық қауымдастығының президенті Степан Березиннің атап өтуінше, жоба кезең-кезеңмен енгізілетін болады. Бірінші қадам жасалды – қаланың барлық дәріханалары мен емханаларында өз бетінше емделуден бас тартуға шақыратын арнайы плакаттар ілінеді. Сонымен қатар, медицина қызметкерлері үшін семинарлар ұйымдастырылып, халық арасында кең ауқымды түсіндіру жұмыстары жүргізіледі.

Айта кетейік, аталған жүйе биыл қыркүйек-қазан айларында толығымен іске қосылады, оның үстіне, жоба тек елордада ғана емес, барша Қазақстан бойынша қолға алынбақ.

astana.gov.kz

Астана әкімі Әділбек Жақсыбеков халықпен есеп беру кездесуі аясында жеке қабылдауына жазылған 45 азаматпен кездесті, деп хабарлады қалалық әкімдіктің баспасөз қызметінен.

Қала басшысы өзінің баяндамасынан кейін бес сағат бойы жеке өзі елорда тұрғындарының тұрғын үй, жер учаскелерін бөлу, құрылыс пен үлестік қатысушылардың проблемалары, білім, ПИК және жолаушылар тасымалы мәселелеріне қатысты сұрақтарына жауап берді.
Ондаған азамат коммуналдық тұрғын үй қорынан тұрғын үй алуға мұқтаждылар тізімі бойынша кезекті күтпей баспана беруді сұрады. Алайда, заңнама бойынша мүгедектер мен ҰОС қатысушылар, сондай-ақ, жетім және ата-анасының қамқорлығынсыз қалған балалар ғана мұндай басымдыққа ие болады.

Қала әкімінің қабылдауында жиі көтерілген мәселелердің бірі — үлестік құрылыс секторындағы проблемалар. Осы мәселеге қатысты сегіз сауал жолданды, бұл ретте қабылдауға жазылған екі тұрғын — үлескерлер тобының өкілдері. Елорда басшысы халықпен кездесу барысында өз баяндамасында әрбір проблемалық нысан бойынша шешім алгоритмі әзірленгенін, сондай-ақ, барлық мәселелер қала басшысының бірінші орынбасары Сергей Хорошунның төрағалығымен үлестік құрылыс мәселелері жөніндегі ведомствоаралық комиссияда қаралатынын атап өткен болатын. Айта кетейік, бүгін әкімге құрылысшылар да жолықты.

Тұрғын үй, спорттық және аула клубын, шыны мен керамиканы пайдаға асыратын зауыттың құрылысы үшін және т.б. мақсаттарда жер учаскелерін бөлуге қатысты өтініштер де болды. Тұрғындар қаланы абаттандыру бойынша жобаларын ұсынды, кейбіреулері елорданы көгалдандыру мәселесіне алаңдаушылық танытты. Елордалықтардың бірі әкімнің жеке қабылдауында орталық паркте «Шолу дөңгелегі» жобасын іске асыруды ұсынды, екіншісі Суворов көшесінде гүлбақ жасауды сұрады. Айта кетейік, соңғы мәселе бойынша жобалық-сметалық құжаттама табиғи ресурстар және табиғат пайдалануды реттеу басқармасымен әзірленіп, жоба келер жылдың мамыр айында қолға алынатын болады.

Қалалық емхана қызметкері Айнаш Сағадиева қызметтік пәтерін ауыстыру туралы өтініш жасады. ДЦП-ға шалдыққан баласы бар ана үшін алтыншы қабаттағы пәтер мен лифттің болмауы біраз қиындықтар тудырады, сондықтан ол басқа қабаттан пәтер беруді өтінді. Бұл мәселе оң шешімін тауып, тұрғын үй және денсаулық сақтау басқармаларына тиісті тапсырмалар берілді.

Әкімнің қабылдауына соңғы болып жазылғандардың бірі 72 жасар спортшы Салтанат Түйтебаев. Бұл қала басшысына алғысын білдірген жалғыз тұрғын. Жеңіл атлетикалық жүгіруді ұнататын Түйтебаев Ә. Жақсыбековтің де жүгіруге әуес екендігін біледі және астаналық марафонда онымен бірге жүгіруге ниет білдірді. Елорда әкімі С. Түйтебаевпен қыркүйек айында Астанада өтетінін қайырымдылық халықаралық марафонда кездесуге уағдаласты.

Әкімнің орынбасарлары өздерінің жеке қабылдаулары аясында қырықтан астам тұрғынды қабылдады. Бүгін әкімнің немесе оның орынбасарларының қабылдауына жазылғандардың барлығы тыңдалды. Жеке қабылдау арқылы әкімнің есеп беру кездесуін өткізудің жаңа форматы тұрғындар тарапынан қолдау тапты.

Сонымен қатар, Конгресс-Холл холлында қала тұрғындарын мазалаған сұрақтарға қалалық басқармалар мен департаменттердің өкілдері де жауап берді.

Күні бойы тұрғындардан жетпіске жуық жазбаша өтініш келіп түскен, оларға жақын арада жауаптар берілетін болады.

ҚазАқпарат