Jas.kz

Каир қаласында Қазақ хандығының 550 жылдығына арналған ғылыми-тәжірибелік конференция барысында «Көшпенділер» трилогиясының араб тіліндегі аудармасы аудармасы таныстырылды.

Шараға қатысқан Қазақстанның Мысырдағы елшісі Берік Арын ашылу салтанатында сөйлеген сөзінде қазақ мемлекетінің тарихи қалыптасуының негізгі кезеңдері мен Ілияс Есенберлиннің әдеби мұралары туралы әңгімелеп берді. Ал «Көшпенділер» трилогиясының негізгі аудармашысы, Асуан университетінің профессоры Рияд қонақтарды шығарманың сюжетімен және Есенберлиннің өмірбаянымен таныстырды.

Көшпенділер — Ілияс Есенберлиннің алты кітаптан тұратын тарихи эпопеясы. Онда бес ғасырлық оқиға, яғни, XV-XIX ғасыр аралығындағы Қазақ хандығы өмір сүрген кезең суреттеледі. Трилогия «Алмас қылыш», «Жанталас» және «Қаһар» деген бөлімдерден тұрады. Ол көптеген тілге аударылған.

kaz.tengrinews.kz

Қазақстандық жас режиссер Дархан Төлегеновтің «Таңғы жұлдыздың сәулесі» атты фильмі «Қырғызстан – қысқа метражды фильмдер елі» атты ТМД, Балтық және Грузияның V Халықаралық кинофестивальдің бас жүлдесіне ие болды.

Фестивальге ұзын-саны 13 туынды келіп түскен. Ал отандасымыз Ерболат Атабай үздік өнері үшін қазылар атынан арнайы сыйлыққа лайықты деп танылды. Ол басты рөлді сомдаған болатын.

24.kz

Ыстамбұлда Turkvizyon-2015 байқауының гранд-финалы өз мәресіне келіп жетті. Биылғы байқаудың бас жүлдесі 194 ұпай жинаған қырғызстандық әнші Жийдешке бұйырды. Ал 185 ұпайға ие болған «Орда» тобы 2-орын алды.

Түркиялық әнші Гөркем Дурмаз 175 ұпаймен 3-орынға табан тіреді. Ал «Бейбітшілік» сыйлығы Ирак елінен келген күміс көмей әнші Оғыз Сырмалыға бұйырды.

Сириялық әнші Әділ Шан «Көрермендер көзайымы» номинациясын жеңіп алды. «Әділ қазылардың арнайы сыйлығы» Германиядан келген Дерья Каптанға табысталды.  Айта кету керек, гранд-финалда Turkvizyon ән байқауының тарихында тұңғыш рет өткен жылы бас жүлдені жеңіп алған Жанар Дұғалова мен Bala Turkvizyon-2015-тің «Алтын дауыс» номинанты Тұрсынхан Еркін арнайы ән шырқады. Өнерпаздар қонақ ретінде шақырылған.

Естеріңізге сала кетейік, мұнда биыл 21 мемлекеттің ең үздік әншілері бақ сынасты. Халықаралық өнер сайысында біздің намысымызды «Олай емес» әнімен «Орда» тобы қорғады. Түркі тілдес мемлекеттердің мәдени-рухани байланысын нығайтуды көздейтін байқауға қазақ елі жыл сайын қатысып келеді. 2013 жылы Түркияның Ескишехир шаһарында алғаш рет өткен сайыста қазақстандық «Ринго» тобы 9-орыннан көрінсе, былтыр Татарстан астанасы Қазан қаласында әнші Жанар Дұғалова күллі өнерсүйер қауымның қошеметіне бөленіп, дүбірлі доданың бас жүлдесін иеленген болатын.

24.kz