Мереке қарсаңында Мемлекет басшысы Нұрсұлтан Назарбаев ағымдағы жылды қорытындылап, телеарна журналистеріне сұхбат беру барысында, журналистер тарапынан салауатты өмір салтына, арнайы диета ұстауына қатысты сауал қойылған еді.
«Қазір жұрттың көпшілігінің проблемасы — арықтау. Арықтардың өзі одан сайын арықтасамын деп жүр. Диета туралы айтады, ет болмайды, май болмайды деген секілді. Біз, қазақтар, қалай етсіз өмір сүреміз? Бір ұрыдан «ұрлықты қашан қоясың» десе, «жылқы етінің тәттілігін қойса, мен ұрлығымды қояр едім» деген екен. Сол секілді менің принципім — адам өзіне, өзінің организміне қажеттіні жеуі керек», — деді Елбасы.
Бұл ретте Н.Назарбаев профессор Шармановты мысалға келтіріп, адам денсаулығы үшін жылқы еті де, қымызы да пайдалы екенін айтты.
«Біздің сүйегімізге сіңген, генетикамызға орныққан жағдайымыз бар. Оны өзгертуге бола ма? Екінші — спорт. Адам өзін-өзі күтуі керек. Біз дені сау, саламатты ұлт болуға тиіспіз. Өзім туралы айтсам, мен ешқандай да диета ұстанбаймын», — деді Н.Назарбаев.