Jas.kz

Бүгін Оңтүстік Қазақстан облысының әкімі Жансейіт Түймебаев «Қазақстан Халық Банкі» АҚ директорлар кеңесінің төрағасы Александр Павлов пен басқарма төрағасы Үміт Шаяхметовамен кездесті, деп хабарлайды ОҚО әкімінің баспасөз қызметі.

Тараптар, өзара әңгімеде Оңтүстіктің әрбір үшінші тұрғыны аталған банктің клиенті екенін алға тартып, оның елдің экономикасы мен халықтың әл-ауқатын көтерудегі үлесіне тоқталды.

«Қазақстан Халық Банкінің» елге қызмет көрсету жөнінен көшбасшы банктердің бірі екеніне тоқталған өңір басшысы бүгінгі ашылатын жаңа ғимараттың заман талабына сай қызмет ететініне сенім білдірді. Өз кезегінде, мәртебелі меймандар да аймақ басшысына алғысын білдіріп, екіжақты бірлесе жұмыс істеуге дайын екенін жеткізді.

Мұнан соң, олар Шымкент қаласындағы «Қазақстан Халық Банкі» АҚ-ның жаңадан ашылған Оңтүстік Қазақстан облыстық филиалының жаңа ғимаратын пайдалануға беру шарасына қатысты.

«Қазақстан Халық Банкінің» бүгінгі ашылған жаңа ғимараты ел Тәуелсіздігінің 25 жылдық мерейтойына жасалған әдемі сый деп есептеймін. Бүгінде халқымызға 40-тан астам филиалдары арқылы қызмет етіп жатқан банк ұжымы әрбір тұтынушыға лайықты қызмет көрсетеді деп ойлаймын. Қаржылық институттардың ішінде абыройлы көш бастап тұрған «Халық Банкіндегі» қызмет көрсету түрлерінің көбейіп, сапасы артарына кәміл сенімдімін», — деді құттықтау сөзінде Ж.Түймебаев.

Қазіргі таңда Банктің Оңтүстік Қазақстан облыстық филиалдарында 700-ге жуық мамандар еңбектенуде. Қызметкерлердің еңбек жағдайларын барынша жақсарту үшін және аймақтағы бизнестің даму сұраныстарына сай келуі үшін банктің топ-менеджменті филиалдың жаңа офиске көшуі туралы шешім қабылдады. Соңғы 12 жылда 8 аймақтық филиалдарында, атап айтқанда, Ақтөбе, Қарағанды, Астана, Қостанай, Семей, Павлодар, Өскемен және Шымкент қалаларында жаңа ғимараттардың құрылысы жүргізілді.

Халық банкінің филиалы Оңтүстік Қазақстан облысында бизнестің көп бағыттары бойынша көшбасшылардың қатарында. Филиалдың депозит портфелі 23,8 млрд. теңгеге жуық, аймақ бойынша комбанктер арасында депозиттік портфель бөлігі — 8,5%. Аймақтық бөлімшелердің ссудалық портфелі- 45,6 млрд теңге, филиал несие портфелі бөлігі бойынша көшбасшы қатарларында — 23,13%. Қазақстан Халық Банкі Оңтүстік Қазақстан облысы бойынша 2300 компанияға жуық жалақы жобалары бойынша қызмет көрсетеді. Төлем карталарының айналыс саны — 444 136. Халық банкі 40 өкілдіктерден тұратын кең ауқымды желісі Оңтүстік Қазақстан облысының шалғай аудандарындағы клиенттерге банктік қызметтердің қөлжетімді болуын қамтамасыз етеді. Сонымен қатар, банк дистанциондық сату каналдарын қарқынды дамытуда — облыста 176 банкомат, 32 банктік киосктер және 42 төлем терминалдары орнатылған. Халық банкі аймақтағы қазақстандық азық-түлік, құрылыс материалдар өндірушілердің, тоқыма өнеркәсіптерін қарқынды несиелендіруде. Филиалдың ШОБ бөлімінің жалпы портфель көлемі- 15 млрд. теңге, соның ішінде 5 млрд. теңге ШОБ қолдау үшін мемлекеттік бағдарламар бойынша.

2016 жылдың 9 айының қорытындысы бойынша «Қазақстан Халық Банкі» қазақстандық коммерциялық банктер арасында кірісі мол банк болып табылды. Банктің Қаржылық институты Fitch Ratings-дан BB; Standard&Poor`s-дан BB және Moody’s Investors Service-тен Ва2 халықаралық рейтингтік агенттіктерден берілген, қазақстандық Екінші деңгейлі банктер арасындағы рейтингі ең жоғарылардың бірі болып табылады.

2016 жылдың шілде айында «Euromoney» халықаралық басылымында Халық банкі үздік қаржылық институты деп танылды. Ал осы жылдың қыркүйек айында «Қазақстан Халық Банкі» АҚ қайырымдылардың рейтингіне еніп, қазақстандық коммерциялық банктерінің арасында 1-ші орынды иеленді. Сонымен қатар, Vlast интернет-журналының нұсқасы бойынша «Елдің 25 ірі қайырымдылық жасаушылары» рейтингіне кірді.

Шардараның балығы шетелге экспортталып жатыр, деп хабарлады аудан әкімдігінің баспасөз қызметінен. Шағалалы Шардарада балық өндірісі өркендей түсті.

«Хамит» балық өңдеу компаниясы су жануарының сүбе етін Грузия, Германия, Украина Республикаларына және Ресей Федерациясына жөнелтуде. Балық шабағын кәсіпорын сырттан тасымалдайды. Тауарды тереңдетіп өңдейтін зауыт соңғы үлгідегі қондырғылармен жабдықталған. Өндіріс орны 200 жергілікті тұрғынды жұмыспен қамтып отыр. Зауыт жылына  3 мың  тоннаға  дейін  өнім  өндіруге  қауқарлы.  Мұнда  қос  бірдей желі жұмыс істейді.  Алдымен, балық  сүйегінен  ажыратылады, сосын сүбе еттен филе  жасалады.  Тіпті,  қалдығынан  ұн  да шығарылады  екен.  Тиімділігі  сол,  шикізат  қалдықсыз  өңделеді.

«Сапалы  өнімге  сұраныс  та жоғары», — дейді цех басшысы. «Хамит»  селолық  тұтынушылар  кооперативі  жылына  өндірген  өнімінің  70 пайызын шетелге жөнелтеді. Қазір зауыт  балықтың  сүйектен  ажыратылған  таза  еті  мен қақталған түріне басымдық берген.  Кәсіпорын өз өнімін Еуроодаққа кіретін мемлекеттердің нарығына шығаруға арнайы рұқсат алған еліміздегі  10 балық өңдеуші  зауыттың бірі. Зауыт негізінен  көксерке мен  алабұғаның  таза  етін  экспорттайды.  Қақталған қаракөз  бен  табанға да сұраныс жоғары. Сондықтан өндіріс басшылығы балық шабағын Қарағандыдан тасымалдап, оны қолдан өсіріп жатыр. Соның  арқасында Ресей, Беларусь елдерімен қатар, Германия мен Францияға дайын өнімдерін экспорттауға көшті.

Облыс әкімі Ж.Түймебаев Оңтүстік Қазақстан облысы Төтенше жағдайлар департаментінің қызметкерлерімен кездесті. Онда қысқа дайындық барысы мен төтенше жағдайлардың алдын алу жайы қаралды, деп хабарлайды ОҚО әкімінің баспасөз қызметі.

Кездесу барысында ОҚО Төтенше жағдайлар департаментінің бастығы азаматтық қорғау подполковнигі Н.Дербісов аталған департаменттің жедел-қызметтік жұмысын баяндады.

Оның айтуынша, 10 айда облыс аумағында 1070 табиғи және техногендік сипаттағы төтенше жағдайлар мен оқиғалар тіркелген. Бұл өткен жылдың осы кезеңімен салыстырғанда 4,4 пайызға төмен. Ал дабыл бойынша Төтенше жағдайлар департаментінің  күштері 5953  рет шыққан. Оның ішінде: 111 рет авариялық-құтқару, 60 рет іздестіру-құтқару жұмыстары болса, 106 адам құтқарылып, төтенше жағдайлар аймағынан 1276 адам эвакуацияланды, ал  9 адамға медициналық көмек көрсетілді.

Жиында қыс мезгіліндегі төтенше жағдайлардың алдын алу бойынша да атқарылған жұмыстар жайын баяндаған азаматтық қорғау подполковнигі «Қыс-2016» республикалық командалық-штабтық оқу-жаттығуын өткізу кезінде облыс бойынша республикалық және облыстық маңызы бар жолдарға қызмет көрсететін жол техникаларының дайындығы тексерілгенін атап өтті.

«2016 жылғы 21  қарашада мамандар облыстық жолдардың қауіпті учаскелерін қарап шықты.   Бәйдібек ауданындағы «Ұланбел-Созак-Шаян-Екпінді» облыстық жолының 606-шақырымында «Одаман бұлақ» асуы, Қошқарата-Жарыкбас-Бірлік» жолының 128-шақырымында «Шыбықбел» асулары орналасқан. Бұл бекеттер толығымен төсек орындарымен және көмірмен қамтамасыз етілген. Әрбір пунктке 10 тоннадан көмір жеткізіледі. Жолдарда «Жылыту бекеті» белгілері орнатылған», — деді Н.Дербисов.

Жалпы, қыс мегілінде 4330,3 шақырым облыстық жолдарға қызмет көрсетіледі. Оның ішінде 1943,3 шақырым жолдар бірінші кезекте қардан тазаланса, 433 шақырым жол қауіпті учаскелер аймағына кіреді.   Сондай-ақ, қауіпті жолдардың төрт бағытында ОҚО ТЖ департаментінің жоғары өтімді техникасы бекітілген, олардың жалпы саны 63 бірлікті құрап отыр.

Ал, облыс бойынша 7 асу, 10 жылыту бекеттері бар. Олардың дайындығын ТЖ қызметкерлері жол қызметінің өкілдерімен бірлесіп тексереді.

Қысқа дайындық барысын тыңдаған облыс әкімі қыс мезгілінде инертті материалдар қорының жеткілікті болуын және техникалардың үнемі дайындықта тұруын жүктеді. Сонымен қатар, облыстық асуларда орналасқан жылыту пункттерінде қатты отынның жеткілікті көлемде қамтылуын қадағалауды облыс әкімінің орынбасары Ж.Бөкенбаевқа тапсырды.

Сондай-ақ, әкім Оңтүстік Қазақстан облысы Төтенше жағдайлар департаментінің бастығы азаматтық қорғау подполковнигі  Н.Дербісовке қыс мезгілінде метеорологиялық құбылыстарға дайын болуды, төтенше жағдайлардың алдын алу және жою бағытындағы жұмыстарды күшейтуді міндеттеді.