Jas.kz

Бүгін Шымкенттегі жеңіл атлетикалық спорт кешенінде каратэ-додан жастар мен жасөспірімдер арасындағы Қазақстан Республикасы  чемпионатының ашылу салтанаты өтті,деп хабарлайды ОҚО әкімінің баспасөз қызметі.

Спорттық шараға Оңтүстік Қазақстан облысының әкімі Ж.Түймебаев, ҚР каратэ-до федерациясының Президенті, Бас прокурордың орынбасары М.Ахметжанов, ҚР Мәдениет және спорт минситрлігі Дене шынықтыру және спорт комитетінің төрағасы Е.Қанағатов, «Қазатомөнеркәсіп» ҰАҚ» АҚ басқарма төрағасы А.Жұмағалиев, ҚР каратэ-до федерациясының  вице-Президенті Ж.Санауов пен каратэ-додан Қазақстан Республикасының бас бапкері П.Мансуров сынды бірқатар еліміздің спорт жанашырлары қатысты.

Ашылу салтанатында сөз алған облыс әкімі Жансейіт Түймебаев еліміздің ең басты оқиғасы болып табылатын егемендігіміздің ширек ғасырлық мерейтойы қарсаңында бастау алған ел біріншілігі республикамыздың басқа аймақтарынан келген 350-ден аса спортшының басын қосып отырғанын атап өтті.

«Облыс тұрғындары атынан барша қатысушы командаларға сәттілік тілей отырып, қасиетті Оңтүстік Қазақстан облысына келгендеріңіз үшін шынайы алғысымды білдіремін. Осы сәтті пайдалана отырып, бүгінгі ел чемпионатының ашылуына арнайы келіп, қатысып отырған Қазақстан Республикасы каратэ-до федерациясының Құрметті Президенті Марат Ахметжановқа 2020 жылы Жапония елінде өтетін жазғы Олимпиада ойындарына каратэ-до спортының енуімен шын жүректен құттықтаймын» -деді әкім.Үш күнге жалғасатын жарысқа Астана, Алматы қалалары мен  еліміздің әр өңірінен келген 24 салмақтағы 300-ден астам  спортшы қатысып, дүбірлі додада 10-13 жас аралығындағы ұл мен қыз бақ сынайды.

Бүгінгі таңда, Оңтүстік Қазақстан облысында 3 облыстық, 8 қалалық және аудандық балалар мен жасөспірімдер спорт мектептері бар. Онда 35 жаттықтырушы  832 балаға каратэ-додан оқу-жаттығу жұмыстарын жүргізеді.

Айта кетейік, облыста каратэ-до спортынан ересектер, жастар, жасөспірімдер мен кадеттер арасындағы ашық республикалық турнир жыл сайын Шымкент қаласында өткізіліп келеді.

Осы спорт түрі бойынша қасиетті жерімізден бірнеше спорт тарландары оның ішінде, Азия ойындарының жеңімпазы Дархан Асадилов, халықаралық дәрежедегі спорт шебері, ересектер арасында Азия чемпионы Мадина Өтелбаева, халықаралық дәрежедегі спорт шебері, жастар арасында Әлем чемпионатының қола жүлдегері Қайсар Алпысбай, халықаралық дәрежедегі спорт шебері, Алдияр Мелдеханов, халықаралық дәрежедегі спорт шебері, Азия ойындарының қола және күміс жүлдегері, бүгінде Оңтүстік Қазақстан облысының осы спорт түрі бойынша аға жаттықтырушысы, Қазақстан Республикасына еңбегі сіңген жаттықтырушы, Қазақ даласының батыры, даңқты балуан Қажымұқан Мұңайтпасовтың немересі Шаттық Қажымұқан шығып отыр.

Бүгін Оңтүстік Қазақстан облысының әкімі Жансейіт Түймебаевтың қатысуымен  Шымкенттің Қапал батыр көшесіндегі көпір пайдалануға берілді, деп хабарлайды ОҚО әкімінің баспасөз қызметі.

 Өңір басшысы салтанатты шараға қатысушыларды темір жол үстінен өтетін өткелдің қайта құру жұмыстарының аяқталуымен құттықтап, жаңа нысанның ел игілігіне қызмет етуіне тілектестік білдірді.

«Елбасының тапсырмасына сәйкес, Шымкент еліміздің үшінші мегаполисіне айналуда. Ал мегаполис ұғымы халық санының артуымен өлшенбейтіні белгілі. Осы дәрежеге лайықты болу үшін барлық салада өсу және даму жоғары қарқын алуы қажет. Қаланың осы талаптарға сай болу бағытында бірқатар жұмыстар атқарып келеміз. Соның бір дәлелі — бүгінгі пайдалануға берілген көпір. Бұл — тұрғындардың қауіпсіздігі мен өмір сүруіне ыңғайлы жағдай жасаудың көрінісі. Алдағы уақытта жол кептелісінің алдын алу мақсатында шаһардағы бірнеше жерден жолайрықтар салу экономикалық-әлеуметтік даму жоспарына енгізілді», — деді Ж.Түймебаев.

Айта кету керек, тоғыз жолдың торабында орналасқан көпір 1960 жылы салынған болатын. Бастапқыда ені 9 метр болған жүріс бөлігі қайта құру жұмыстарынан соң 21 метрге дейін кеңейді. Сондай-ақ, көпірдің жарықтандыру жұмыстары жүргізіліп, апатты жағдайы жойылды. Нәтижесінде, Төле би, Қапал батыр, Ақназар хан, Анаров көшелерінде көлік тығындары азайды.

Нысан жұмыстарына «Корпорация Береке А» ЖШС мердігерлік етсе, техникалық қадағалаушы болып «ЕрГарантСтрой» ЖШС, ал жобалаушы мекеме ретінде «Алматы Жоба» ЖШС мекемесі құрылыс жұмыстарын жүргізді. Қайта құру кезінде 100-ден астам адам тұрақты жұмыспен қамтылды.

Жалпы, облыс бойынша жыл басынан бері ұзындығы 800 шақырым болатын облыстық маңызы бар жалпы пайдаланымдағы автомобиль жолдары және елді мекен көшелеріне күрделі және орта жөндеу жұмыстары жүргізілуде. Салаға жауапты мамандардың айтуынша, жоғарыда аталған барлық көпірлер мен 664,7 шақырым жол (282 нысан) жыл соңына дейін пайдалануға беріледі деп күтілуде.  Оның ішінде, 17 көпір де бар.

Айтыс өнері — қазақтың қанына сіңген бекзат өнер. Бабалардан қалған осы өнерге елеңдемейтін қазақ жоқ. Еңсе тіктеген баласынан еңкейген қариясына дейін суырып салма ақындарды тыңдаудан жалыққан емес.  Топырағы киелі Арыс қаласында жыл сайын дәстүрлі түрде  облыстық жас ақындар айтысы өткізіліп келеді, деп хабарлайды ОҚО әкімінің баспасөз қызметі.

Бүгін қалалық ішкі саясат және «Жастар ресурстық орталығы» КММ-нің ұйымдастыруымен дәстүрлі айтыстың шымылдығы ашылды. Қалалық мәдениет үйінде Қазақстан Республикасы Тәуелсіздігінің 25 жылдығына орай «Елімнің бақытын тербеткен — Тәуелсіздік» тақырыбында облыстық деңгейде жас ақындар айтысы өтті.

Қала әкімі М.Қадырбек  айтысты ашып, жас ақындарға сәттілік тіледі. Сондай-ақ, айтыскер ақын Карима Оралова жас ақындарға арнауын айтты. Табан астында тауып айтып, сөз өнерінің інжу-маржанын ұтымды жеткізе білген ақындарға Ж.Байгуттиева атындағы «Өнер» мектебінің директоры Ж.Сейітбеков, Арыс қалалық тілдерді оқыту орталығының қазақ тілі және әдебиеті пәнінің мұғалімі З.Досымбекова, ақын- ұстаз Р.Сұлтанәлиева қазылық етті.

Дүбірлі айтыста ақындарамыз Тәуелсіздіктің 25 жылдығы аясында жырдан шашу-шашып, бір-біріне өткір сұрақтар қойып, ұтымды жауаптар қайтарып, айтыс сүйер қауымның  көңілінен шығып, көрермендерді желпіндіріп отырды.

Нәтижесінде, «Бас жүлдені» Сайрам ауданының азулы ақыны Ж.Мырзабеков қанжығасына байласа, І- орынды Созақ ауданынан А.Ниязбек еншіледі. ІІ-орынды отырарлық ақын М.Жақып алса, ІІІ-орын Төлеби ауданының ақыны Б.Рахматуллаевқа бұйырды.

Арыс қаласы әкімінің арнайы сыйлығын шымкенттік ақын Ж.Балқаш жеңіп алды. Ал түркістандық Ы.Досжанова «Үздік жас ақын» номинациясымен марапатталды. Айтысқа қатысқан жас ақындардың барлығы Арыс қаласының әкімі М.Қадырбектің «Алғыс хатымен» марапатталып, түрлі бағалы сыйлықтарға ие болды.

Осыдан екі апта бұрын Шымкент қаласы әкімдігінің жанында ашылған мемлекеттік қызмет көрсету орталығының мамандары мыңыншы қала тұрғынына қызмет көрсетті, деп хабарлайды ОҚО әкімінің баспасөз қызметі.

Бүгін, «Front office»-ке келген қала тұрғыны Тамара Ратушина жер актісінде жазылған өзінің тегін ауыстурға қажетті құжаттарын рәсімдеуден соң, «Front office» ұжымы атынан арнайы сыйлыққа ие болды.

«Қарапайым қала тұрғыны ретінде қажетті құжаттарды ресімдеуге 5 минут ғана жұмсадым. Өте ыңғайлы, қоңырау шалу, қажетті құжат жинаудың барлығы интернет ресурстары арқылы жүзеге асуда. Қала тұрғындарын осы қызмет түрін пайдалануға шақырамын», — деді Тамара Ратушина.

Қазіргі таңда аталған орталықта жер қатынастар, сәулет, кәсіпкерлік, тұрғын-үй шаруашылығы, әкімдіктің барлық бөлімдерінен ұзын саны 25 маман қызмет етуде. 400-ден астам қызмет түрі көрсетіледі.

Сайрам ауданына қарасты елді мекендерде инфрақұрылым жұмыстары қарқынды түрде жүргізіліп жатыр, деп жазады ОҚО әкімінің баспасөз қызметі.

Мәселен, ондағы Көлкент ауылының 6 көшесі коммуналдық қажеттіліктермен қамтамасыз етіліп, оның ішінде, ауыз су құбырлары жүргізілсе, жол бетіне асфальт төселіп, аяқ жолдар салынуда.

Ұзындығы 7 шақырым болатын жолдарды жарықтандыру жайы да жоспарда бар. Бүгінде онда электр бағаналарын орнату үшін қуаты күшті трансформатор орнату жұмыстары атқарылуда. Осы жылдың қазан айында басталған жұмыстар 2017 жылдың басында аяқталып, пайдалануға беріледі деп күтілуде.

21 мыңнан астам халқы бар Көлкент елді мекені Сайрам ауданындағы ірі ауылдардың бірі. Мұнда жалпы саны 90-нан астам ұзынды-қысқалы көшелер бар. Ал ондағы коммуналдық қажеттіліктердің шешімі табылған.