Jas.kz

Алматы облысының кәсіпкерлері «Даму» қорының қызметкерлерімен бірлесіп Талдықорғандағы «Жастар» саябағында Тәуелсіздіктің 25 жылдығына орай 25 түп емен отырғызды, деп хабарлайды Алматы облысы әкімінің баспасөз қызметі.

«Бизнес аллеясы» акциясына «Бизнестің жол картасы — 2020» бизнесті дамыту мен қолдаудың бірыңғай бағдарламасы негізінде мемлекеттік қолдауға ие болған Start-up кәсіпкерлері қатысты. Олардың барлығы да – «Даму» қорының клиенттері. Олардың арасында балаларды жан-жақты дамыту орталығын ашқан «Долженко Ирина Анатлоьевна» ЖК, фитнес-орталық ашқан «Черноиванова Ирина Игорьевна», сол сияқты «Белгібаева Дина» ЖК, «Арлен» балабақшасы»  және «Микронет» ЖШС-лары бар.

Кәсіпкерлер мен қор мамандары Тәуелсіздіктің 25 жылдығы жалпыхалықтың мереке деп есептейді. Сондықтан бұл айтулы мерекеге әрбір азамат үлес қосуға талпынады.

— Бұл — мерейтойға деген біздің ортақ сыйымыз. Біз жетісулық кәсіпкерлермен бірлесіп, Тәуелсіз Қазақстанның өзінде мықты 25 түп емен отырғыздық. Бұл ауқымды акция біздің шағын шаһарымызды көркейтуге қосқан үлесіміз болсын, — деді «Даму» қорының аймақтық филиалының директоры Бақыт Мұсаев.

Жалпы, Тәуелсіздіктің 25 жылдығы қарсаңында «Талдықорған – бақ қала» акциясының жалғасы ретінде облыс орталығында тағы 250 000 ағаш көшеттері отырғызылатын болады.

Алматы облысының 9 айдағы әлеуметтік-экономикалық дамуы және IV тоқсанға арналған міндеттер туралы мәселе бүгін облыс әкімі Амандық Баталовтың төрағалығымен өткен әкімдік отырысында қаралды.

Негізгі баяндаманы облыс әкімінің бірінші орынбасары Ләззат Тұрлашов жасады.

Л. Тұрлашовтың айтуынша, облыстың 9 айдағы әлеуметтік-экономикалық көрсеткіштерінен барлық салада өсім байқалды.

Мәселен, ауыл шаруашылығында жалпы өнім көлемі 404,5 млрд. теңгені құрады, нақты көлем индексі – 101,6%. Дәнді масақты дақылдар, картоп, көкөніс, бақша, жеміс-жидек, жүзімді жинау аяқталды. Жүгері, күріш, майлы дақылдар мен қант қызылшасын жинау жалғасуда. Барлығы 773,2 мың тонна астық бастырылды немесе өткен жылға қарағанда — 108,4%.

Шағын және орта бизнес саласында жұмыспен қамтылғандар саны өткен жылға қарағанда 30,0 мың адамға артып, 281,9 мыңды құрады. Шағын және орта бизнес субъектілерінен бюджетке 36,9 млрд. теңге түсті, жергілікті бюджет көлеміндегі үлесі 2015 жылдың сәйкес кезеңінде 27% болса, қазірге кезде 37%-ті құрайды.

Жалпы биылғы жылы кәсіпкерлікті қолдауға 15,4 млрд.теңге көзделді, бұл 2015 жылдан 2,7 есеге (5,6 млрд. теңге)  көп. Оның ішінде «Бизнестің жол картасы – 2020» аясында жалпы 32,8 млрд. теңге несие сомасына 225 жоба қамтылды.

Мұнан кейін Лаззат Махатұлы әлеуметтік салаға тоқталып, онда 52 объект салынатынын, оның ішінде «Нұрлы жол» бағдарламасы аясында 27 мектеп және 3 балабақшаның құрылысы жүріп жатқанын атап өтті. Денсаулық сақтау саласында күрделі жөндеу жоспарланған 13 объектінің 6-уы аяқталды, қалғандары бойынша жұмыс кесте бойынша жүргізілуде.

Оң өсім құрылыс саласында, инвестиция тарту ісінде, орталықтандырылған су жүйесімен қамтуда да байқалады.

Баяндамасының соңында Л. Тұрлашов жыл соңына дейін атқарылатын міндеттерге тоқталды. Атап айтқанда, «Нұрлы жол», «Балапан», «Бизнестің жол картасы — 2020», «Жұмыспен қамту жол картасы — 2020» мемлекеттік бағдарламаларының шеңберінде ауқымды жұмыстарды жалғастыру қажет. Өнеркәсіп саласындағы жұмысқа екпін қосу керек. Жылыту маусымы тұрақты бақылауда болуы тиіс. Әлеуметтік маңызды азық-түлік бағасы үнемі қадағалануы керек.

Жиын соңында облыс әкімі А. Баталов:

Расында да облыс бойынша барлық саладағы көрсеткіштер ойдағыдай. Сіздерге Текелі қаласы мен Жамбыл ауданын үлгі етіп айта аламын. Бұл өңірлер осы уақытқа дейін айтулы жетістіктерге жетіп, алдыларына қойылған міндеттерді абыроймен орындап келеді. Жыл соңына дейін одан да биік көрсеткіштерге жетуге мүмкіндіктері бар. Міне, осылай жұмыс жасау керек, қолда бар мүмкіндіктерді тиімді пайдалана білу керек, Мемлекет басшысы қойған міндеттерді кешенді түрде орындауда бастамашы болу қажет. Әсіресе «Нұрлы жол» бағдарламасы аясында берілген қаржының дер кезінде мақсатты игерілуіне  ерекше назар аударуымыз қажет, — деді.

Сонымен қатар А. Баталов облыстың алдында өңір бойынша Тәуелсіздіктің 25 жылдығына арналған шараларды өткізу міндеті тұрғанын да атап өтті. Сондықтан барлық бағытта белсенді әрі сапалы жұмыс істеуге шақырды.

Кеше облыстық мәслихаттың кезектен тыс IX сессиясы өтті. Сессияның күн тәртібінде Алматы облыстық мәслихатының 2015 жылғы 14 желтоқсандағы «Алматы облысының 2016-2018 жылдарға арналған облыстық бюджеті туралы» № 51-287 шешіміне өзгерістер мен толықтырулар енгізу туралы мәселе қаралды.

Негізгі баяндаманы облыстық экономика және бюджеттік жоспарлау басқармасының басшысы Н. Сатыбалдина жасап, бірнеше функционалдық топ бойынша көзделген шығындар туралы хабарлады.

Баяндамашының айтуынша, Заңға сәйкес республикалық бюджеттен қосымша 9,5 млрд. теңге сомасында нысаналы ағымдағы трансферттер бөлінген. Жалпы облыс бюджетінің параметрлері 7,8 млрд. теңгеге көбейген.

Балқаш, Панфилов, Талғар аудандары мен Талдықорған қаласы  маңындағы өзендерде жүргізілетін төтенше жағдайлардың алдын алу шараларына жалпы сомасы 235 млн. теңге, білім саласында оқушыларды тасымалдау, мектептер мен балабақшалардың, Оқушылар сарайының  материалдық-техникалық базасын нығайту, білім беру нысандарына жөндеу жүргізу, сұйық отын сатып алу және басқа да жұмыстарына жергілікті бюджеттен 1 070,5 млн. теңге, республикалық бюджеттен 1104, 8 млн. теңге қарастырылған. Сонымен қатар денсаулық сақтау, әлеуметтік көмек көрсету, мәдениет, спорт, туризм және ақпараттық кеңістік салаларының да бірқатар шараларына көлемді қаржы жұмсалмақ.

Ауыл шаруашылығында басқа мәселелерді айтпағанның өзінде Көксу қант зауытына дейін қант қызылшасын тасымалдауға – 175,6 млн. теңге жергілікті бюджеттен көзделіп отыр.

«Жұмыспен қамтудың жол картасы — 2020» бағдарламасы аясында жолдарды жөндеу мен елді мекендерді абаттандыру шараларын аяқтауға – 833,3 млн. теңге бөлінеді.

Н. Сатыбалдина басқа да функционалдық топтар бойынша көзделген шығындар туралы толық баяндап, депутаттарды облыстық мәслихаттың 2016 жылғы облыс бюджетіне өзгерістер енгізу туралы шешімінің жобасын түсіндіріп берді.

Жиынды қорытындылаған облыс әкімі Амандық Баталов:

— «Нұрлы жол» және басқа да мемлекеттік бағдарламалар бойынша бөлінген қаражатты мақсатты пайдаланып, қаржының игерілмей қалуына жол бермеуге тиіспіз. Әзірге алға қойған жоспарларымыз ретімен орындалып келеді. Жыл соңына дейін қарқынды жұмыс істеуіміз керек.

Осында отырған аудан, қала әкімдерінің ең бірінші жұмысы – Тәуелсіздіктің 25 жылдығын лайықты атқару. Осы мерейлі дата аясында жаңа өнеркәсіп орындарын ашу, жаңа балабақшалар ашу, су құбырларын іске қосу сияқты ауқымды шаралар жоспарланып отыр. Дегенмен күнтізбелік шаралармен шектелмей, одан тыс тағы қандай ауыз толтырып айтатын іс-шаралар бар ойларыңызда, ұсыныңыздар, — деді.

Жалпы, облыс бюджеті қазір 410,9 млрд. теңгені құрап отыр.