18 тамызда сағат 20:00 «Астана-Арена» стадионында «Астана» ФК мен белоруссиялық «Батэ» командасының арсында УЕФА Еуропа Лигасының плей-офф матчы өтеді. Кездесу соңына дейін Қабанбай батыр және Тұран даңғылдары Керей мен Жәнібек хандар көшесінен Хусейн бен Талал көшесіне дейін жабылады. Жүргізушілерге Орынбор көшесі арқылы жүру ұсынылады, деп хабарлайды қалалық әкімдіктің баспасөз қызметі.

Астана қаласының ІІД Жергілікті полиция қызметі жүргізушілерден мұқият болып, қоғамдық көлікпен жүруге кеңес береді. Әуежайға баратын астаналықтар мен жақын маңдағы елді мекендердің тұрғындарынан балама жолдарды алдын ала жоспарлауды сұраймыз.

Көрермендерге ыңғайлы болуы үшін сағат 18.00 жанкүйерлерді бес жерден алып кету үшін арнайы рейстер (шаттлдар) ұйымдастырылады. Автобустар мына мекен жайлар бойынша тұрады:

1)  «Қазақстан» СК жанындағы тұрақ (Қ. Мұңайтпасов к-сі);

2)  «Әзірет Сұлтан» мешітінің жанында (Р. Қошқарбаев даңғылы);

3)   «Нұр-Астана» мешітінің жанында (шығыс жағындағы тұрақ);

4)  Астаналық цирк жанындағы тұрақ (Қорғалжын тасжолының бойындағы тұрақ);

5)  Қ. Мұңайтпасов атындағы стадионның жанындағы тұрақ (Кенесары к-сі);

Жанкүйерлерді қайта жеткізу үшін шаттлдар Қабанбай батыр даңғылының бойында «Астана-Арена» стадионының тұрағында және аялдамада тұрады.