Үстіміздегі  жылдың 10 қыркүйегінде Елордада Алматы облысының ауылшаруашылық тауарларын өндірушілердің қатысуымен облыстық ауылшаруашылығы  жәрмеңкесі  өтеді. Оған аграрлы аймақтың 16 ауданы, 3 қаласы және іргелі «Жетісу» әлеуметтік кәсіпкерлік корпорациясы  қатысады, деп хабарлайды Алматы облысының өңірлік коммуникациялар қызметі.

Жәрмеңкеге көлемі 340 тонна ауылшаруашылығы өнімдерін апару жоспарлануда. Қала тұрғындары жетісулық еңбеккерлердің маңдай терімен келген ауылшаруашылығы өнімдерінің 38-ден астам түрімен қамтамасыз етілмек. Оның ішіндегі 30 тоннадан астам алма жемісінің 10 тоннасы апорт. Жәрмеңкедегі сату бағалары қаладағы бөлшек сауда құнынан 15-20 пайызға төмен болады. Бұл туралы Алматы облысының өңірлік коммуникациялар қызметінде өткен брифингте облыстық ауылшаруашылығы басқармасының бөлім басшысы Талғат Алыбаев айтты.

— Жәрмеңкеде сатылатын өнімдердің санитарлық-эпидемиологиялық және ветеринарлық сапасына қатаң бақылау қойылады. Автокеруен екі күн бұрын, яғни 8 қыркүйекте аттанады. Жәрмеңке 10 қыркүйек күні таңғы сағат 8.00-ден 16.00-ге дейін жалғасады. Бұл жәрмеңке азық-түлік бағасын тұрақтандыру, бағаның негізсіз өсуіне жол бермеу және азық-түлік қауіпсіздігін қамтамасыз ету мақсатында ұйымдастырылып отыр, — деді Т. Алыбаев.