Әнші Әлішер Кәрімов «Ниетіміз таза болса…» атты Қазақстан қалаларына көшпелі турнесін бастап кетті.

24 қыркүйек күні Көкшетау қаласынан бастау алған турне 25 қыркүйекте кеншілер қаласында жалғасты. Қарағанды жамағаты талантты әншіні жылы қабылдады. Жаңа әндерімен қатар танымал әндерін жанды дауыста орындаған Әлішерге толы зал қошеметін аямады.

«Таза ниет адамның басты қасиеті деп ойлаймын. Ниетіңіз таза болса барлық есіктер сіз үшін ашық болып, өзге жандар да сондай ниетпен қарайтын болады. Сондықтан да жеке концертіме «Ниетіміз таза болса» деген атау бердім. Солтүстік Қазақстан қалаларынан кейін, қазан айында көшпелі турнемізбен Батыс Қазақстанға барамыз» -, дейді Әлішер Кәрімов тілшімізге берген сұқбатында.

«MuzZone» телеарнасының атқаушы директорының айтуынша, «Қазақстанның барлық қалаларына турне жасап, жанды дауыста концерт беретін екі-ақ әнші бар. Біріншісі — Әлішер, екіншісі — Айқын»

Естеріңізге сала кетейік, Кәрімов 27 қыркүйекте – Өскемен, 28 қыркүйекте – Семей, 29 қыркүйекте – Павлодар жұртшылығын жеке концертімен қуантатын болады. Бұл әншінің осымен екінші рет қатарынан өтіп жатқан концерттік туры.