Өлшем бірлігін қамтамасыз ету саласындағы заңдылықтарды бұзу оқиғалары Алматы облысында әлі де бар. ҚР «Өлшем бірлігін қамтамасыз ету туралы» Заңының талаптары көбіне медициналық және білім беру мекемелерінде бұзылып, өлшем құралдары тексеріссіз қолданылады. Бұл жөнінде Алматы облысының өңірлік коммуникациялар қызметінде өткен брифингте Техникалық реттеу және метрология комитетінің Алматы облысы бойынша департаменті басшысының міндетін атқарушы Әбжапарұлы Әкімов мәлімдеді.

— Мемлекеттік метрологиялық бақылау ұйымдастыру және жүргізу шеңберінде 2016 жылдың 9 айы ішінде 97 тексеріс жүргізіліп, 48 заң бүзушылық анықталды. Осы уақыт аралығында заңды тұлғалар 11 304 930 теңге көлемінде әкімшілік жауапкершілікке тартылған, — деді Ә. Әкімов.

Сондай-ақ, ҚР Мемлекеттік рәміздерін орнату және қолдану қағидалары бойынша аталған департамент облыстың 11 ауданында түсіндіру жұмыстарын жүргізген. «Қазақстан Республикасының Мемлекеттік Елтаңбасы. Техникалық талаптары» атты №989-2014 ҚР СТ Ұлттық стандартына өзгерістер енгізіліп, Қазақстан Республикасының Мемлекеттік Елтаңбасын өндіруді жақсартуға көп мүмкіншілік береді. Мәселен, Қазақстан Республикасының Мемлекеттік Елтаңбасының түсінің талаптарына өзгерістер енді. Конструкторлық сызбалары қайтадан қарастырылды. Сонымен қатар, Мемлекеттік Елтаңбаны сапалы өндіру мақсатында үш жылдық кепілдік мерзім енгізілген.