Алматы облысындағы Алакөл жағалауын көл суы шайып жатыр. Нақтырақ айтқанда, Көктұма ауылындағы бүтін бір көше судың астында қалған. Күз және көктем кездерінде жел қатайып, жағалауды шайып кетеді. Аталған өзекті мәселе жөнінде бүгін Алматы облысының әкімі Амандық Баталов бірінші вице-премьер Асқар Маминге мәлімдеді.
Қазіргі таңда Алакөл жағалауын бекіту жұмыстары өзекті проблема болып тұр. Аталған мәселені шешу үшін қыруар қаржы қажет. Қазірдің өзінде бір шақырымнан астам жер көлдің астында қалған. Амандық Баталов Көктұманың өзекті мәселесін шешу жөнінде ҚР Премьер-Министрінің бірінші орынбасары Асқар Маминнен көмек сұрады. Бірақ аталған жұмыстарды атқару үшін нақты қанша қаражат керектігі жөнінде айтылмады. Сондай-ақ Амандық Баталов бірінші вице-премьерге облыстағы туризм саласы төңірегінде атқарылып жатқан жұмыстар жайлы хабардар етті. Енді туристер Алакөлге ұшақ арқылы қатынайтын болады.
Көктемде Үшарал әуежайы алғашқы жолаушыларын қабылдайды деп жоспарлануда. Аталған жоба құрылысына 1 млрд теңгеден астам қаржы бөлінді. Сондай-ақ қазіргі таңда Алакөлде 400-500 орындық заман талабына сай демалыс орындары салынып жатыр.