Қала тұрғындары мен қонақтарының арасында кең тараған демалыс түрлерінің бірі — коньки тебу. 1 қазанда «Алау» мұз сарайында кезекті бұқаралық коньки тебу маусымы ашылды, деп хабарлайды қалалық әкімдіктің баспасөз қызметі. Бүгінге дейін аталған спорт орталығына 22 мыңға жуық адам барған.

Чемпиондық мұз айдынында жаппай коньки тебу шарасы салауатты өмір салтын насихаттауға, қала тұрғындарын спортқа баулуға бағытталған. Мұнда дене шынықтыру мен спортқа деген қызығушылықты арттыру үшін түрлі спорттық-көңіл көтеру шаралары тұрақты негізде өткізіліп тұрады. Сондай-ақ, жастарға және халықтың әлеуметтік әлсіз топтарының өкілдері үшін жеңілдіктер қарастырылған.

«Биыл біз 1 қазанда ашылдық, және осының алдындағы жылдармен салыстырғанда келушілер саны 30%-ға көп, яғни, Мұз сарайы коньки спортының түрлерін насихаттау бағытында жұмыс істеп келеді деп айтуға негіз бар. Биыл біз қайырымдылық шеңберінде белсенді негізде жұмыс жүргізудеміз, мұнда балалар үйлерінің балалары тегін негізде жиі келеді», — деп мәлім етті «Алау» Мұз сарайы директорының орынбасары Ильдар Садыков.

«Алау»  отбасымен бірге уақыт өткізуге ең лайық орын, дейді мұз сарайына келушілердің бірі Әсел Мәселова. Ол қысқы спорт түрлерін жақсы көреді, және өз балаларын да спортқа буылып келеді.

«Әр демалыс сайын, мектеп каникулы кезінде балалармен бірге келуге тырысамыз, бұл салауатты өмір салты ғой. Барлық астаналықтарды балалармен бірге демалуға шақырамын, бұл өте пайдалы, бұл жер де керемет. Менің ата-анам бала кезімнен шаңғы, коньки тебуге үйретті. Өзім де балаларыма үйреткім келеді, кішкентайынан спортпен әуестенгенін қалаймын», — дейді Әсел Мәселова.

«Алауда» коньки тебуге арналған екі корт бар. Мұнда дүйсенбіден басқа кез келген күні келуге болады. Демалыс күндері — бес сеанс, жұмыс күндері үш сағаттық — 1 сеанс қарастырылған.

Жергілікті тұрғындардан басқа, Мұз сарайына Қазақстанның басқа қалаларынан келген қонақтар мен шетелдіктер жиі келеді.

«Мен Астанаға Алматы қаласынан келдім, осында тұрып жатқаныма үш ай болды. Мұз сарайында құрбымды коньки тебуге үйреттім. «Алау» Астанадағы керемет орын. Өзім қысты және мұзда коньки тепкенді ұнатамын», — дейлі Медея Ахмарова.

Бұқаралық коньки тебуден басқа, мұз сарайының халықаралық жарыстар кестесі бар. Мысалы, желтоқсанның 2 інен 4-іне дейін ол өз айдынында конькимен жүгіру спортынан әлем Кубогының үшінші кезеңін қабылдайды, ал 7 желтоқсанда келушілер үшін есігін қайта ашады.