16 қарашада «Астана Опера» театрының Камералық залында композитор, әдебиет және өнер саласындағы ҚР Мемлекеттік сыйлығының лауреаты Балнұр Қыдырбектің ел Тәуелсіздігінің 25 жылдығына арналған «Бабалар аманаты — Тәуелсіздік» атты концерті өтеді, деп хабарлайды қалалық әкімдіктің баспасөз қызметі.

Концерт бағдарламасында композитордың оркестрлік, вокалдық және басқа да шығармалары орындалады, соның ішінде «Ақтау сарыны», «Өрен», «Өрлеу», «Гауһар күй», «Дешті-Қыпшақ», «Балғын», «Туған мекен  Күреңбел», «Сенбейсің», «Той көбейсін» және т.б..

«Мен бұл кешті камералық оркестрге жазылған шығармаларға арнағым келді. Өзім аса толқыныспен күтетін мереке — Тәуелсіздік күні қарсаңында бұл әуендер жақсы қабылданады деп ойлаймын. Жалпы, мен өз шығармашылығымда махаббат, Отанға деген сүйіспеншілік, табиғатқа, туған өлкеге деген махаббат сезімін жырлап келемін», — дейді Балнұр Қыдырбек.