Алдағы 5 жылдың ішінде іске асырылып жатқан және іске асыруға жоспарланған бағдарламалардың шеңберінде бюджеттік қаржыландыру есебінен Құрылыс басқармасы бойынша тұрғын үйлерді тапсыру көлемі 7 472 пәтерге 386 мың м2 құрайтын болады. Бұл туралы тұрғын үй құрылысын дамыту мәселесіне арналған кеңесте Астана қаласы әкімінің бірінші орынбасары Сергей Хорошун хабарлады.

Соның ішінде арендалық баспана — 60 мың м2 (немесе 1 403 пәтер); несиеге берілетін баспана — 146 мың м2 (2 942 пәтер); ТҚЖБ көздері есебінен тұрғын үйлер – 99 мың м2 (1 705 пәтер); жергілікті бюджет қаржысын қайталап пайдалану есебінен — 80 мың м2 (1 422 пәтер).

«19 жыл ішінде Астанада 17 млн шаршы метр тұрғын үй пайдалануға берілді. Үстіміздегі жылы біз тағы 2 миллион м2 астам баспананы тапсыруды жоспарлап отырмыз. Тұрғын үй құрылысы көлемінің жыл сайынғы өсім қарқыны Мемлекет басшысы халықты тұрғын үймен қамту бойынша берген тапсырмалардың шеңберінде мемлекеттік қолдау бағдарламаларын іске асырудың арқасында сақталып отыр. Біз әлемнің жаһандық қалаларының даму тәжірибесін зерттеп, алдағы перспективаларының және негізінен қаланың бағдарламалық құжатында іске асыру жолдарының кешенді көрінісі әзірленді. Қаланың келешектегі дамуы экологиялық таза технологияларды және қоғамдық кеңістіктерді үйлесімді абаттандыруды өзара байланыстыру арқылы қарастырылуда», — деп атап көрсетті Астана әкімі Әсет Исекешев.