Алматы облысы орталығының іргесінен орын тепкен Көксу ауданындағы «Уыз Май Industry» майбұршақ өңдеу зауыты 2015 жылы 3968,6 млн. теңгеге 30,0 мың тоннаның өнімін өңдірген. Ал, ағымдағы жылдың есепті мерзімінде 6 млрд. 493 млн. теңгеге 22 мың тонна өнім өндірілді. Сонымен қатар, көкжиегі кең кәсіпорын өкілдері 2018 жылы 15 жаңа жұмыс орнын қамтитын, жалпы құны 300 млн. теңгені құрайтын өсімдік майын дезодорациялап және рафинациялап ыдысқа құю желісін, 2019 жылы 15 жаңа жұмыс орнын қамтитын жалпы құны 350 млн. теңгені құрайтын ұн комбинатының құрылысын жоспарлап отыр.
Осыдан бірнеше жыл бұрын, нақтырақ айтсақ, 2012 жылдан өндірісін тоқтатқан «Көксу қант зауытының» тамырына да қан жүгірді. Былтыр кәсіпорын қайта жаңғыртылып, өз қаражаты есебінен жалпы бөлінген 1 млрд. 200 млн. теңгенің 308,0 млн. теңгесі 2015 жылы жұмсалып, күрделі жөндеу жұмыстары жүргізілген. Ал, ағымдағы жылы кәсіпорын қаражаты есебінен 420,0 млн. теңгеге модернизациялау жүргізілді. Бұл туралы Алматы облысының өңірлік коммуникациялар қызметінде өткен брифингте БАҚ өкілдеріне Көксу ауданының әкімі Алмас Әділ баяндап берді. Зауыт былтыр 1558 млн. теңгеге 10,8 мың тонна өнім шығарды. Биыл 200 мың тонна қант қызылшасын қабылдауды жоспарлап отыр. Нәтижесінде 15 мың тонна өнім өндіру көзделуде.
Ұлт жоспарының 60-қадамы ауылда кооперацияны дамыту арқылы сүт өндіру және өңдеуге стратегиялық инвесторлар тартуды көздейді. Көксу ауданы бойынша былтыр 16095 тонна сүт өндірілген. Қазіргі таңда 2009 жылдан жұмысын тоқтатқан «Көксу Арна» ЖШС-нің сүт зауыты қайта жаңғыртылып, 2016 жылдың мамыр айынан қайта іске қосылды. Зауыт құрғақ сүт және сары май өнімдерін шығарады. Тәулігіне 30-40 тонна сүт қабылдап, өнімдерімен 14 жұмыс орнын қамтиды. Бүгінгі күнге зауыт 29,1 тонна құрғақ сүт және 12 тонна сары май өндірген. Енді Балпық ауылдық округінде «Каримов» шаруа қожалығы 400 басқа арналған сүтті тауарлы фермасының құрылысын бастап, осы жылдың аяғына іске қосуды жоспарлап отырған көрінеді.
Алматы облысының өңірлік коммуникациялар қызметі