Қазан айының 8-9 күндері Жамбыл облысында Қазақ хандығының 550 жылдығы аясында «Ұлы дала ойындары» өтеді.
– Мерейтой аясында Ұлттық спорт түрлері қауымтастығымен бірлесіп, аламан бәйге, топ бәйге және ұшқыр бәйге жарыстарын ұйымдастырғалы отырмыз. Жеңімпаздарға берілетін сыйақы демеушілер тарапынан үлестіріледі. Аламан бәйгеден бірінші келген сәйгүлікке 10 миллион теңге беріледі. Негізі аламан бәйге бойынша 7 атқа жүлде белгіленген. Ал топ бәйгенің бас жүлдесі 5 миллион теңге болады. Сондай-ақ ұшқыр бәйгеден оза шапқан тұлпардың иесі 3 миллион теңгені қалтасына басады. Жалпы «Ұлы дала ойындарының» жүлде қоры – 33 миллион теңгені құрап отыр, – дейді Жамбыл облысы әкімінің орынбасары Абдалы Нұрәлиев.
Сондай-ақ ұлттық спорттың өзге түрлерінен көрсетілімдер болады екен.
– Ұлы дала ойындары аясында жақын бəйге, аламан бəйге, ұшқыр бəйге өтеді. Сонымен қатар ел арасында аты айтылғанмен, заты жойылып бара жатқан жамбы ату жарысын арнайы осы ұлы дала ойындарының қатарына қосып отырмыз. Сондықтан, Көрермен ат үстінде шауып келе жатып, садақ ату өнерін тамашалай алады, — дейді Ұлттық спорт түрлері қауымдастығының президенті Б.Тілеухан.
Айта кетейік, аламан бәйгенің ұзақтығы 31 шақырымды құрап отыр.