Соңғы кездері елімізде шағын және орта бизнеске көрсетілетін қолдау артты. Тұтынушылар арасында шетелдік тауарларға сұраныс төмендеді. Бірақ, кәсіпкерлер үшін кедергілер әлі де жоқ емес. Жергілікті кәсіпкерлерге күмәнмен қарайтындардың қатарында жер қойнауын пайдаланушылар бар болып шықты. Өңірдегі мұнай мен кен өндірушілер сапаны және бағаны сылтау етіп, тапсырыстарын өзгелерге береді.

— Жергілікті тауар өндірушілерді жер қойнауын пайдаланушылар таңдамайды. Олар шетелдік компанияларды таңдайды. Оны тәжірибеден, зерттеуден байқауымызға болады, — дейді индустриалды-инновациялық даму басқармасының бөлім басшысы Дәулетияр Тоғызбаев.

Отандық өндірушілердің конкурс құжаттарын толтыруда жіберетін қателіктерінен тендерге түскен кезде де жеңіліс тауып жатады. Сол себепті облыс әкімдігі кәсіпкерлердің сауаттылығын арттыру мақсатында арнайы білім жетілдіру сабақтарын өткізіп жатыр. Астанадан арнайы келген «Самұрық-Қазына Контракт» ЖШС-нің мамандары жергілікті тауар өндірушілерге дәріс оқыды. Байқау құжаттарын сауатты толтыруды үйретті, деп хабарлайды aktobenews.kz.