«Ақтөбе» футбол орталығы бесінші түлектерін шығарып салды. Үлкен футболға барлығы 18 жастағы 23 түлек қадам басты, деп жазады Ақтөбе жаңалықтары.

2012 жылы құрылған орталық осыған дейін 100-ге жуық жас футболшыны тәрбиеледі. Талай футболшыны жасыл алаңда теңбіл доптың шебері етті. Осы орталықта тәлім алған Абат Айымбетов, Дидар Жалмұқандар «Ақтөбе» футбол клубына талай мәрте жеңіс әкелді.
Футбол орталығының тәрбиеленушілері биылғы маусымда ел чемпионатынан Ақтөбеге жеңіс әкелді. Қазан айында Павлодар қаласында өткен ел чемпионатында Әлібек Мәмбетжанов, Данияр Айбекұлы үздік ойын көрсетті. Сондай-ақ, биыл қыркүйек айында Астана қаласында өткен ел чемпионатында Мақсат Құрманғазин үздік қақпашы деп танылды. Ал, Данияр Өмірәлиев үздік шабуылшы атағын жеңіп алды. Салтанатты шарада команда капитандарына кубок табысталды.