Көрініс ретінде қойылған желтоқсан жаңғырығында  жылаған аналардың зарлы үні мектеп оқушыларын тебірентті, деп жазады aktobenews.kz.

Ақтөбеде №49 мектеп оқушыларының арасында «Тәуелсіздік -қасиет тұнған ұлы ұғым» атты мерекелік шара өткізілді. Оқушылар қазақ халқының тарихын Кенесары хан заманынан бастап, бүгінгі күніне дейін бейнеледі. Көш бастаған ақ тайлақ, қазақ халқы басынан кешкен зұлмат замандар айтылды. 1986 жылы қазақ жастарының алаңға шығуы, Қайрат Рысқұлбековтың абақтыға қамалуын көрініс ретінде қойды. Өктем әскери қызметкерлер, зар жылаған ана, ату жазасына кесу сәтінен берілген көріністер қойылым тамашалағандарды тебірентті. Мектеп мұғалімі Аяжан Салдырова желтоқсан ызғарында кеткен қазақ жастарының тағдырын айтып, мектеп оқушыларына рух берді.

Мектептегі шара ата-әжелерге арналған кездесумен жалғасты. 1986 жылғы оқиғаны көзімен көрген кейіпкерлер бейбіт елдің ұландарын ел тыныштығын қадірлеуге шақырды. Болашақта қазақ елінің биікке көтеретін ұрпақтың саналы, білімді, иманды болып  шығуға міндетті екендерін айтты.