Оқушылар сарайында елорда әкімі Әсет Исекешевтің атынан жаңажылдық қойылым өтті, деп хабарлайды қалалық әкімдіктің баспасөз қызметі. Шырша мерекесіне 300 бала шақырылды, олардың арасында мүмкіндігі шектеулі, ата-ана қамқорлығынан айырылған және жетім балалар, дарынды оқушылар бар.

Жаңажылдық шыршаға келгендер ертегіге саяхат жасады, балалармен бірге сүйікті мультфильмдердің кейіпкерлері көңіл көтерді. Ал арнайы құрылған ерекше декорациялар мерекеге ерекше сипат берді.

Мерекелік думан талантты режиссер, халық әртісі Талғат Теменовтың жетекшілігімен ұйымдастырылды. Залдағы  төрт сахнада шығармашылық ұжымдар өз өнерлерін ортаға салды. Шара LED-экрандар арқылы көрсетілді.

Балалар мен ата-аналарды келе жатқан Жаңа жылмен елорда әкімінің орынбасары Ермек Аманшаев құттықтады.

«Балаларды, ата-аналарды келе жатқан Жаңа жылмен құттықтаймын. Келесі жылы еліміздің алдында ауқымды міндеттер тұр. Жаңа жылда бәріміз сиқырға сенеміз, сендердің тілеген тілектерің орындалсын, сиқыр болсын. Баршаңызға бейбітшілік, жақсылық пен бақыт тілеймін», — деді ол.

Шараға келген әрбір бала ерекше костюмдер киіп, мерекенің көңілді өтуіне өз үлестерін қосты.