Елорданың үздік дизайнерлері, сәулетшілері және суретшілері бас қаланың туристік символын жасауда шеберлік байқасады, аталған символ Астананы әлемдік сахнада таныстыратын болады. Бұл туралы бүгін баспасөз мәслихатында журналистерге Ішкі саясат басқармасының басшысы Ерлан Каналимов мәлім етті. Жобаның мақсаты — елорданың имиджін нығайтып, танымалдылығын арттыру, туристік тартымдылығын насихаттау.

Шараға Қазақстан Республикасы Мемлекеттік елтаңбасының авторы, ғалым, архитектор Жандарбек Мәлібеков және «Санар» жобалаушы-өндірістік компаниясы» ЖШС басшысы Сағындық Жамболатов қатысты. Астана қаласының туристік символының үздік эскиз-жобасына ашық республикалық байқау бір ай бойы 26 желтоқсаннан 25 қаңтарға дейінгі аралықта өтеді. Аталған кезеңде халықтық дауыс беру арқылы және қазылар алқасының бағалауымен үш үздік жоба таңдап алынады. Байқауға қатысуға өтініштер жеке тұлғалардан да, заңды тұлғалардан да қабылданады, дейді ұйымдастырушылар.

Қазіргі уақытта жүлделі орындарды анықтайтын туристік символды әзірлеу бойынша жұмыс тобы құрылды. Сонымен қатар, байқаудың ашықтығын қамтамасыз ету мақсатында интернет-дауыс беру өткізу жоспарланған.

«Бұл — өте маңызды жоба. Символика осы қаланың ерекшелігін көрсетіп тұруы тиіс. Архитектор ретінде айта кетерім, қалаға ең алдымен заманауи архитектура қажет. Бізде жүйе бар, архитектуралық ансамбльдер бар, қаланың туристік тартымдылығы мен ерекшелігін солар айшықтап тұрады. Символ қаланың көрікті жерлерін, ландшафтының ерекшеліктерін, тарихын көрсетіп, сол уақытта заманға сай, жарқын, түсінікті болуы тиіс. Ал түстері қазақ халқының декоративті өнерінің түс пен композициялық дәстүрлеріне сүйенуі керек», — деп атап көрсетті архитектор Сағындық Жамболатов.

Байқаудың қорытындысы бойынша жұмыс тобының мүшелері 5-6 нобайды таңдап, ұялы қосымша және интернет арқылы ашық дауыс беруге ұсынады. Байқаудың ұйымдастырушылары оның жүлде қорын да жариялады: 1-ші орынның иегері 2 миллион теңге алса, 2-ші орынға  1 миллион, 3-ші орынға 500 мың теңге сыйақы қарастырылған.

Анықтама телефондары: +7 (7172) 556719, 556717. Сондай-ақ, эскиздерді uvp535@mail.ru электронды мекенжайына жолдауға болады.